گورنر بلوچستان کا میڈیا کی بدلتی صورتحال پر اظہارِ خیال.

گورنر بلوچستان جعفر خان مندوخیل نے کہا ہے کہ جمہوریت اور آزاد صحافت ایک دوسرے سے جڑی ہوئی ہیں۔ انہوں نے کہا کہ آرٹیفیشل انٹیلیجنس اور ڈیجیٹل ٹیکنالوجی کے باعث میڈیا کا نظام تیزی سے بدل رہا ہے، اس لیے صحافیوں کے لیے ضروری ہے کہ وہ جدید تقاضوں کے مطابق خود کو ہم آہنگ کریں۔

رپورٹ: سیدہ نتاشا

گورنر بلوچستان جعفر خان مندوخیل نے کہا ہے کہ جمہوریت اور آزاد صحافت ایک دوسرے سے جڑی ہوئی ہیں اور صحافت حکومت اور عوام کے درمیان رابطے کا اہم ذریعہ ہے۔
انہوں نے یہ بات گورنر ہاؤس کوئٹہ میں سماء ٹی وی کے بیورو چیف جلال نورزئی کی قیادت میں آئے وفد سے ملاقات کے دوران کہی۔ ملاقات میں سینئر صحافی شہزادہ ذوالفقار اور کوئٹہ پریس کلب کے صدر عرفان سعید بھی موجود تھے۔
گورنر بلوچستان کا کہنا تھا کہ میڈیا اور جرنلزم کو آرٹیفیشل انٹیلیجنس اور سوشل میڈیا کی تیز رفتار ترقی کے باعث نئے چیلنجز کا سامنا ہے۔ اگر صحافی جدید ٹیکنالوجی اور ڈیجیٹل مہارتوں سے خود کو ہم آہنگ نہ کریں تو مستقبل میں مسائل پیدا ہو سکتے ہیں۔

انہوں نے کہا کہ دنیا تیزی سے پین لیس اور پیپر لیس دور کی جانب بڑھ رہی ہے جس کے باعث میڈیا کا پورا نظام بدل رہا ہے۔ اس تبدیلی کے نتیجے میں دنیا بھر میں بڑے میڈیا اداروں میں ڈاؤن سائزنگ ہو رہی ہے اور روایتی کاروباری ماڈلز ختم ہوتے جا رہے ہیں۔
گورنر بلوچستان نے کہا کہ بدلتے حالات کو سمجھنا اور وقت کے ساتھ خود کو ہم آہنگ کرنا ناگزیر ہے کیونکہ میڈیا کا مستقبل اسی صلاحیت سے جڑا ہوا ہے۔