کچ مانگی کے ریونیو اور اراضی مسائل کے حل کے لیے اعلیٰ سطحی کمیٹی تشکیل

کوئٹہ: وزیراعلیٰ بلوچستان میر سرفراز بگٹی کی ہدایت پر کچ مانگی کے علاقے سے متعلق ریونیو اور اراضی کے دیرینہ مسائل کے حل کے لیے اعلیٰ سطحی کمیٹی تشکیل دے دی گئی ہے۔

سروسز اینڈ جنرل ایڈمنسٹریشن ڈیپارٹمنٹ (ایس اینڈ جی اے ڈی) کی جانب سے جاری نوٹیفکیشن کے مطابق کمیٹی کا قیام کچ مانگی کے ریونیو معاملات کا تفصیلی جائزہ لینے اور ان کے حل کے لیے قابلِ عمل سفارشات مرتب کرنے کے مقصد سے عمل میں لایا گیا ہے۔

نوٹیفکیشن کے مطابق کمیٹی کے چیئرمین وزیر بورڈ آف ریونیو ہوں گے، جبکہ اس کے اراکین میں کمشنر سبی، ڈپٹی کمشنر زیارت، ڈائریکٹر جنرل مائنز اینڈ منرلز، سینئر ممبر بورڈ آف ریونیو کے نمائندے اور کچ مانگی کے تین مقامی نمائندگان شامل ہوں گے۔

کمیٹی کچ مانگی کے علاقے میں ریونیو، اراضی اور دیگر متعلقہ امور کا جامع جائزہ لے گی اور تمام پہلوؤں کو مدنظر رکھتے ہوئے اپنی سفارشات مرتب کرے گی۔

حکومت بلوچستان کے مطابق کمیٹی 15 روز کے اندر اپنی رپورٹ اور سفارشات حکومت کو پیش کرے گی تاکہ اس معاملے پر شفاف، مؤثر اور دیرپا بنیادوں پر فیصلہ کیا جا سکے۔

Keywords : Kach Mangi, Balochistan Government, Revenue Issues, Land Dispute