پی بی 36 قلات میں ری پولنگ: صوبائی الیکشن کمشنر کی زیر صدارت اعلیٰ سطحی اجلاس

کوئٹہ میں صوبائی الیکشن کمشنر علی اصغر سیال کی زیر صدارت ایک اعلیٰ سطحی اجلاس منعقد ہوا جس میں پی بی 36 قلات کے 7 پولنگ اسٹیشنوں پر 10 مارچ کو ہونے والی ری پولنگ کے انتظامات کا جائزہ لیا گیا۔ اجلاس میں سیکیورٹی، شفافیت اور غیر جانبدار انتخابی عملے کی تعیناتی پر تفصیلی غور کیا گیا۔

رپورٹ: سیدہ نتاشا

کوئٹہ میں صوبائی الیکشن کمشنر علی اصغر سیال کی زیر صدارت ایک اہم اعلیٰ سطحی اجلاس منعقد ہوا، جس میں حلقہ PB-36 Kalat کے 7 پولنگ اسٹیشنوں پر 10 مارچ کو ہونے والی ری پولنگ کے انتظامات کا تفصیلی جائزہ لیا گیا۔
اجلاس کے دوران شفاف اور پرامن ری پولنگ کو یقینی بنانے کے لیے مختلف امور پر غور کیا گیا۔ صوبائی الیکشن کمشنر نے ہدایت دی کہ انتہائی حساس پولنگ اسٹیشنوں پر سیکیورٹی کے سخت انتظامات کیے جائیں اور ضرورت پڑنے پر فوج اور ایف سی کی تعیناتی پر بھی غور کیا جائے۔

علی اصغر سیال نے اس بات پر زور دیا کہ غیر جانبدار اور مستند انتخابی عملے کی تعیناتی کو ہر صورت یقینی بنایا جائے تاکہ انتخابی عمل شفاف اور قابلِ اعتماد ہو۔ انہوں نے کہا کہ ووٹرز کو آزادانہ طور پر اپنا حقِ رائے دہی استعمال کرنے کا مکمل موقع فراہم کیا جائے گا اور اس مقصد کے لیے فول پروف سیکیورٹی انتظامات کیے جائیں گے۔
اجلاس میں ضلعی انتظامیہ، پولیس اور الیکشن حکام نے شرکت کی اور ری پولنگ کے تمام انتظامات کو حتمی شکل دینے پر اتفاق کیا گیا۔