چیف سیکرٹری بلوچستان کی زیر صدارت سیکرٹریز کمیٹی کا اعلیٰ سطحی اجلاس

چیف سیکرٹری بلوچستان شکیل قادر خان کی زیر صدارت منعقدہ سیکرٹریز کمیٹی کے اجلاس میں ترقیاتی منصوبوں کی شفاف نگرانی، خالی آسامیوں پر شفاف تقرریوں، کیش لیس اکانومی کے فروغ اور سوشل میڈیا کے مؤثر استعمال پر اہم فیصلے کیے گئے۔ اجلاس میں گڈ گورننس اور عوامی فلاح کو مضبوط بنانے پر زور دیا گیا۔

رپورٹ: سیدہ نتاشا

چیف سیکرٹری بلوچستان شکیل قادر خان کی زیر صدارت سیکرٹریز کمیٹی کا ایک اعلیٰ سطحی اجلاس منعقد ہوا، جس میں صوبے میں جاری ترقیاتی منصوبوں، سرکاری بھرتیوں، اور انتظامی اصلاحات کا تفصیلی جائزہ لیا گیا۔
اجلاس سے خطاب کرتے ہوئے چیف سیکرٹری نے کہا کہ M&E سیکشن کی فعالی سے ترقیاتی منصوبوں کی نگرانی میں شفافیت اور کارکردگی میں نمایاں اضافہ ہوگا، جس سے عوامی فلاح و بہبود کے منصوبوں کی بروقت تکمیل ممکن بنائی جا سکے گی۔

اجلاس میں تمام محکموں کو ہدایت کی گئی کہ خالی آسامیوں پر تقرریوں کا عمل مکمل طور پر شفاف بنایا جائے۔ بریفنگ میں بتایا گیا کہ صوبے کے مختلف محکموں میں گریڈ 1 سے 15 کی 16 ہزار سے زائد آسامیوں جبکہ گریڈ 16 اور اس سے اوپر کی 4 ہزار آسامیوں کے اشتہارات جاری کیے جا چکے ہیں۔
چیف سیکرٹری نے کیش لیس اکانومی کے فروغ کے لیے تمام سرکاری لین دین کو ڈیجیٹل پلیٹ فارمز پر منتقل کرنے کی ہدایت دیتے ہوئے کہا کہ یہ اقدام شفافیت اور سہولت دونوں میں اضافہ کرے گا۔
انہوں نے تمام سرکاری ملازمین کو اپنی جائے تعیناتی پر حاضری یقینی بنانے کی سخت ہدایت بھی کی۔ اس کے علاوہ ترقیاتی منصوبوں کی سوشل میڈیا پر مؤثر پروجیکشن کو ایک اہم حکمت عملی قرار دیتے ہوئے کہا کہ اس سے عوام کو منصوبوں کی حقیقی صورتحال سے آگاہی ملے گی، عوامی اعتماد بڑھے گا اور منصوبوں کی بروقت تکمیل میں مدد ملے گی۔
چیف سیکرٹری کے مطابق یہ تمام فیصلے بلوچستان میں عوامی خدمت، شفافیت اور گڈ گورننس کو مزید مضبوط بنانے کی سمت ایک اہم قدم ہیں۔