سندھ اور بلوچستان کے مؤثر تعاون سے سرحدی علاقوں میں امن و امان میں نمایاں بہتری، وزیراعلیٰ بلوچستان

وزیراعلیٰ بلوچستان میر سرفراز بگٹی نے وزیراعلیٰ سندھ سید مراد علی شاہ سے کراچی میں ملاقات کے دوران کہا کہ دونوں صوبوں کے درمیان مؤثر رابطہ کاری اور قانون نافذ کرنے والے اداروں کے باہمی تعاون سے سرحدی علاقوں میں امن و امان کی صورتحال بہتر ہوئی ہے۔ ملاقات میں ملکی سیاسی، معاشی صورتحال اور بین الصوبائی تعاون پر تفصیلی گفتگو کی گئی۔

رپورٹ: سیدہ نتاشا

وزیراعلیٰ بلوچستان میر سرفراز بگٹی نے وزیراعلیٰ سندھ سید مراد علی شاہ سے وزیراعلیٰ ہاؤس کراچی میں ملاقات کی، جس میں ملکی سیاسی، معاشی اور سماجی صورتحال سمیت باہمی دلچسپی کے اہم امور پر تفصیلی تبادلہ خیال کیا گیا۔ اس اعلیٰ سطحی ملاقات میں چیئرمین سینیٹ سید یوسف رضا گیلانی، گورنر پنجاب سلیم حیدر، گورنر خیبر پختونخوا فیصل کریم کنڈی اور وزیراعظم آزاد کشمیر فیصل راٹھوڑ بھی شریک تھے، جبکہ پاکستان پیپلز پارٹی کے سینئر رہنماؤں اور صوبائی وزراء نے بھی شرکت کی۔
ملاقات کے دوران ملکی معیشت، سیاسی استحکام، سماجی ترقی، پاکستان پیپلز پارٹی کی تنظیمی صورتحال اور بین الصوبائی تعاون کے فروغ پر سیر حاصل گفتگو کی گئی۔ وزیراعلیٰ بلوچستان میر سرفراز بگٹی نے اس موقع پر کہا کہ سندھ اور بلوچستان کے درمیان مؤثر رابطہ کاری اور تعاون کے نتیجے میں سرحدی علاقوں میں امن و امان کی صورتحال میں نمایاں بہتری آئی ہے۔ انہوں نے کہا کہ دونوں صوبوں کے قانون نافذ کرنے والے اداروں کے مابین بہتر ہم آہنگی سے جرائم پر مؤثر قابو پایا گیا ہے اور آئندہ اس تعاون کو مزید مضبوط کیا جائے گا۔
وزیراعلیٰ بلوچستان نے صوبوں کے درمیان سیاسی ہم آہنگی کو قومی استحکام کی بنیاد قرار دیتے ہوئے کہا کہ باہمی اشتراک سے ہی پائیدار ترقی ممکن ہے۔ وزیراعلیٰ سندھ سید مراد علی شاہ نے گفتگو کرتے ہوئے کہا کہ ملکی معیشت بہتری کی جانب گامزن ہے اور اس کے مثبت اثرات عوامی فلاح اور غربت کے خاتمے کی صورت میں سامنے آئیں گے۔ انہوں نے کہا کہ سیاسی استحکام سے معیشت مزید مضبوط ہوگی اور حکومتی پالیسیوں کے باعث عوام کا ریاستی نظام پر اعتماد بحال ہو رہا ہے۔
وزیراعظم آزاد کشمیر فیصل راٹھوڑ نے کہا کہ آزاد کشمیر کی ترقی کے لیے وفاقی حکومت اور صوبوں کا تعاون نہایت اہم ہے، جبکہ ملکی استحکام اور معاشی بہتری کے اثرات آزاد کشمیر تک منتقل ہو رہے ہیں۔ چیئرمین سینیٹ سید یوسف رضا گیلانی نے قانون سازی اور پارلیمانی امور پر گفتگو کرتے ہوئے کہا کہ جمہوری عمل کو مضبوط بنانے کے لیے پارلیمنٹ کا مؤثر کردار وقت کی اہم ضرورت ہے۔