مستونگ میں مسافر گاڑی پر مسلح افراد کی فائرنگ، ایک شخص جاں بحق، اہلیہ زخمی

مستونگ کے علاقے دشت کمبیلہ میں نامعلوم مسلح افراد کی فائرنگ سے علی مرتضیٰ جاں بحق جبکہ ان کی اہلیہ زخمی ہوگئیں، جبکہ ان کی دو کمسن بیٹیاں محفوظ رہیں۔ پولیس نے واقعے کی تحقیقات شروع کر دی ہیں اور حملہ آوروں کی شناخت و گرفتاری کے لیے کارروائی جاری ہے۔

مستونگ : ضلع مستونگ کے علاقے دشت کمبیلہ میں نامعلوم مسلح افراد کی فائرنگ سے ایک شخص جاں بحق جبکہ اس کی اہلیہ زخمی ہوگئیں۔ پولیس کے مطابق متاثرہ خاندان کوئٹہ سے کراچی جا رہا تھا کہ راستہ بھٹک کر این-25 اور این-65 شاہراہوں کو ملانے والی لنک روڈ پر پہنچ گیا۔

پولیس نے بتایا کہ مسلح افراد نے گاڑی کو روکنے کی کوشش کی اور گاڑی نہ رکنے پر فائرنگ کر دی، جس کے نتیجے میں گاڑی میں سوار علی مرتضیٰ موقع پر جاں بحق ہوگئے جبکہ ان کی اہلیہ زخمی ہوئیں۔

واقعے کے دوران گاڑی میں موجود ان کی چار اور سات سالہ دو بیٹیاں محفوظ رہیں اور انہیں کوئی نقصان نہیں پہنچا۔

اطلاع ملتے ہی پولیس موقع پر پہنچ گئی اور لاش و زخمی خاتون کو قریبی اسپتال منتقل کیا، جہاں قانونی کارروائی مکمل کرنے کے بعد لاش ورثا کے حوالے کر دی گئی۔

پولیس نے واقعے کا مقدمہ درج کرکے تحقیقات شروع کر دی ہیں، جبکہ حملے میں ملوث ملزمان کی شناخت اور گرفتاری کے لیے کارروائی جاری ہے۔