حب میں بچوں کے تحفظ و فلاح کے لیے اعلیٰ سطحی اجلاس، چائلڈ لیبر اور کم عمری کی شادیوں کے خلاف سخت کارروائی کا فیصلہ

ڈپٹی کمشنر حب کی زیر صدارت اجلاس میں بچوں کے تحفظ، چائلڈ لیبر اور کم عمری کی شادیوں جیسے مسائل پر تفصیلی غور کیا گیا۔ اجلاس میں خلاف ورزیوں کے خلاف سخت کارروائی، آگاہی مہمات اور بچوں کے لیے محفوظ ماحول یقینی بنانے کا عزم کیا گیا

حب میں بچوں کے تحفظ اور فلاح و بہبود کے حوالے سے اجلاس ڈپٹی کمشنر حب کی زیرِ صدارت منعقد ہوا، جس میں ضلعی افسران، پولیس، محکمہ صحت و تعلیم، علماء کرام، سول سوسائٹی اور سماجی تنظیموں کے نمائندوں نے شرکت کی۔اجلاس میں بچوں کو درپیش مسائل، چائلڈ لیبر، کم عمری کی شادیاں، گداگری اور استحصال پرغور کیا گیا۔ شرکاء نے اس بات پر اتفاق کیا کہ بچوں کے حقوق کا تحفظ اور انہیں محفوظ ماحول کی فراہمی تمام اداروں کی مشترکہ ذمہ داری ہے۔ڈپٹی کمشنر حب نے متعلقہ محکموں کو ہدایت دی کہ بچوں کے استحصال، مشقت اور کم عمری کی شادیوں کے خلاف قوانین پر مؤثر عملدرآمد یقینی بنایا جائے اور خلاف ورزی کرنے والوں کے خلاف سخت کارروائی کی جائے۔اجلاس میں فیصلہ کیا گیا کہ بچوں کے حقوق سے متعلق آگاہی کے لیے ضلع بھر میں خصوصی مہمات، سیمینارز اورتعلیمی سیشنز منعقد کیے جائیں گے، جبکہ چائلڈ لیبر اور گداگری کے خلاف بھی مشترکہ کارروائیاں عمل میں لائی جائیں گی۔اجلاس کے اختتام پر اس عزم کا اعادہ کیا گیا کہ ضلع حب میں بچوں کے لیے محفوظ، صحت مند اور سازگار ماحول کی فراہمی یقینی بنانے کے لیے تمام ادارے باہمی تعاون سے کام کریں گے۔