بلوچستان کے مختلف اضلاع میں شدید گرمی، بارش اور گرج چمک کی پیش گوئی، انتظامیہ کو الرٹ رہنے کی ہدایت

ریجنل میٹرولوجیکل سینٹر کوئٹہ نے آئندہ 48 سے 72 گھنٹوں کے دوران بیشتر اضلاع میں شدید گرم موسم جبکہ مختلف علاقوں میں بارش، تیز ہواؤں اور گرج چمک کی پیش گوئی کی ہے۔ محکمہ موسمیات نے ضلعی انتظامیہ کو ممکنہ گرد آلود طوفانوں، تیز ہواؤں اور گرج چمک کے پیش نظر احتیاطی تدابیر اختیار کرنے اور الرٹ رہنے کی ہدایت کی ہے۔

کوئٹہ: ریجنل میٹرولوجیکل سینٹر (آر ایم سی) کوئٹہ نے آئندہ 48 سے 72 گھنٹوں کے دوران بلوچستان کے بیشتر اضلاع میں شدید گرم اور زیادہ تر خشک موسم کی پیش گوئی کرتے ہوئے متعدد علاقوں میں بارش، تیز ہواؤں اور گرج چمک کے امکانات ظاہر کیے ہیں۔

محکمہ موسمیات کے مطابق صوبے میں سب سے زیادہ درجہ حرارت نوکنڈی میں 45.5 ڈگری سینٹی گریڈ اور دالبندین میں 44 ڈگری سینٹی گریڈ ریکارڈ کیا گیا، جبکہ سب سے کم زیادہ سے زیادہ درجہ حرارت قلات میں 33 ڈگری سینٹی گریڈ رہا۔ دیگر اضلاع میں پنجگور اور اُتھل 39، کوئٹہ 38، سمنگلی 37.5، خضدار 36.5، بارکھان اور آر ایم سی کوئٹہ 36، سریاب 35.5، ژوب 34.5، پسنی 34، جیوانی 33.5، اورماڑہ اور قلات 33 جبکہ گوادر میں 32.5 ڈگری سینٹی گریڈ درجہ حرارت ریکارڈ کیا گیا۔

محکمہ موسمیات نے پیش گوئی کی ہے کہ خضدار، بارکھان، رخشانی، پنجگور، ژوب، شیرانی، موسیٰ خیل، زیارت، کوہلو، دکی، ہرنائی اور لورالائی میں بارش اور گرج چمک کے ساتھ تیز ہوائیں چلنے کا امکان ہے۔

اسی طرح قلعہ سیف اللہ، کیچ، آواران، کوئٹہ اور مستونگ میں ہلکی بارش یا بوندا باندی کے ساتھ گرد آلود تیز ہوائیں چلنے کی توقع ہے، جبکہ صوبے کے شمال مغربی علاقوں میں گرد آلود جھکڑ چل سکتے ہیں۔ ساحلی پٹی میں جزوی طور پر ابر آلود سے ابر آلود موسم رہنے کا امکان ظاہر کیا گیا ہے۔

ریجنل میٹرولوجیکل سینٹر نے ضلعی انتظامیہ کو ہدایت کی ہے کہ وہ ممکنہ گرج چمک، تیز ہواؤں اور گرد آلود طوفانوں سے پیدا ہونے والے خطرات کے پیش نظر حساس علاقوں میں احتیاطی اقدامات یقینی بنائیں اور متعلقہ ادارے الرٹ رہیں۔