محرم الحرام کے دوران فول پروف سیکیورٹی یقینی بنائی جائے، کسی غفلت کی گنجائش نہیں: اشفاق احمد

ایڈیشنل آئی جی پولیس/کمانڈنٹ بلوچستان کانسٹیبلری اشفاق احمد نے محرم الحرام کے دوران صوبے بھر میں سخت سیکیورٹی انتظامات اور حساس مقامات کی خصوصی نگرانی کی ہدایت جاری کی۔ انہوں نے کہا کہ عوام کے جان و مال کے تحفظ کے لیے تمام وسائل بروئے کار لائے جائیں گے اور سیکیورٹی پلان پر کسی قسم کی کوتاہی برداشت نہیں کی جائے گی۔

کوئٹہ: ایڈیشنل انسپکٹر جنرل آف پولیس/کمانڈنٹ بلوچستان کانسٹیبلری اشفاق احمد نے محرم الحرام کے دوران امن و امان کی صورتحال اور سیکیورٹی انتظامات کے جائزے کے لیے بدر لائن ہیڈکوارٹر میں اجلاس کی صدارت کی۔

اجلاس میں کوئٹہ سمیت صوبے بھر میں مجالس، جلوسوں، امام بارگاہوں اور حساس مقامات کی سیکیورٹی، نفری کی تعیناتی، گشت کے نظام اور ہنگامی صورتحال سے نمٹنے کے اقدامات کا جائزہ لیا گیا۔

اشفاق احمد نے ہدایت کی کہ محرم الحرام کے دوران عوام کے جان و مال کے تحفظ کو یقینی بنانے کے لیے تمام دستیاب وسائل بروئے کار لائے جائیں اور صوبے بھر میں فول پروف سیکیورٹی انتظامات کیے جائیں۔ انہوں نے حساس مقامات، داخلی و خارجی راستوں اور جلوسوں کے راستوں پر خصوصی نگرانی، مشکوک سرگرمیوں پر کڑی نظر رکھنے اور قانون نافذ کرنے والے اداروں کے ساتھ مؤثر رابطہ برقرار رکھنے کی ہدایت کی۔

انہوں نے واضح کیا کہ سیکیورٹی پلان پر عملدرآمد میں کسی قسم کی غفلت برداشت نہیں کی جائے گی اور بلوچستان کانسٹیبلری محرم الحرام کے دوران پرامن ماحول اور مذہبی ہم آہنگی کے قیام کے لیے اپنی ذمہ داریاں بھرپور انداز میں انجام دے گی۔