آپریشن شعبان: مزید 4 خوارج ہلاک، کارروائی میں مارے گئے دہشت گردوں کی تعداد 83 ہوگئی

سیکیورٹی ذرائع کے مطابق آپریشن شعبان کے دوران مزید چار خوارج دہشت گرد ہلاک ہوگئے، جس کے بعد کارروائی میں مارے گئے دہشت گردوں کی تعداد 83 ہوگئی۔ ذرائع کا کہنا ہے کہ 5 جولائی سے اب تک آپریشن شعبان اور دیگر انٹیلی جنس بنیادوں پر کیے گئے آپریشنز میں مجموعی طور پر 121 دہشت گرد مارے جا چکے ہیں۔

کوئٹہ: سیکیورٹی ذرائع کے مطابق بلوچستان میں پاکستان آرمی، فرنٹیئر کور (ایف سی) اور بلوچستان پولیس کی جانب سے مشترکہ آپریشن شعبان کامیابی سے جاری ہے، جس کے دوران مزید چار خوارج دہشت گرد مارے گئے ہیں۔

ذرائع نے بتایا کہ آپریشن شعبان کے دوران ہلاک ہونے والے دہشت گردوں کی مجموعی تعداد 83 ہو گئی ہے۔ ان کے مطابق دہشت گردوں کے خلاف فضائی اور زمینی کارروائیاں مربوط انداز میں جاری ہیں، جن کے نتیجے میں فتنہ الخوارج سے تعلق رکھنے والے دہشت گردوں کو بھاری نقصان پہنچا ہے۔

سیکیورٹی ذرائع کا کہنا ہے کہ 5 جولائی سے اب تک آپریشن شعبان اور دیگر انٹیلی جنس بنیادوں پر کیے گئے آپریشنز کے دوران مجموعی طور پر 121 دہشت گرد ہلاک کیے جا چکے ہیں۔ انہوں نے واضح کیا کہ بلوچستان بھر میں آپریشن شعبان آخری دہشت گرد کے خاتمے تک جاری رہے گا۔