وزیراعظم کی مون سون کے دوران ہنگامی تیاریوں اور رابطہ کاری مزید مؤثر بنانے کی ہدایت

وزیراعظم شہباز شریف نے این ڈی ایم اے کے چیئرمین سے ملاقات میں مون سون بارشوں کے دوران صوبائی حکومتوں اور ڈیزاسٹر مینجمنٹ اداروں کے درمیان رابطہ مزید مضبوط بنانے کی ہدایت کی۔ اجلاس میں ہنگامی صورتحال سے نمٹنے کی تیاریوں، ابتدائی انتباہی نظام کو مکمل فعال بنانے اور وزارتِ موسمیاتی تبدیلی کے ساتھ جاری رابطہ کاری پر بھی بریفنگ دی گئی۔

اسلام آباد: وزیراعظم محمد شہباز شریف سے نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین لیفٹیننٹ جنرل انعام حیدر ملک نے ملاقات کی، جس میں ملک بھر میں مون سون بارشوں کے دوران ممکنہ ہنگامی صورتحال سے نمٹنے کے لیے کی جانے والی تیاریوں کا جائزہ لیا گیا۔

ملاقات کے دوران وزیراعظم کو مون سون سیزن کے لیے کیے گئے انتظامات اور کسی بھی ممکنہ ہنگامی صورتحال سے نمٹنے کے لیے جاری اقدامات پر بریفنگ دی گئی۔

وزیراعظم نے ہدایت کی کہ مون سون بارشوں کے دوران صوبائی حکومتوں اور صوبائی ڈیزاسٹر مینجمنٹ اتھارٹیز کے درمیان رابطہ اور باہمی تعاون کو مزید مؤثر بنایا جائے تاکہ کسی بھی ہنگامی صورتحال میں بروقت اور مربوط کارروائی یقینی بنائی جا سکے۔

وزیراعظم کو ابتدائی انتباہی نظام (ارلی وارننگ سسٹم) کو مکمل طور پر فعال بنانے اور اس سلسلے میں وزارتِ موسمیاتی تبدیلی کے ساتھ جاری رابطہ کاری سے متعلق پیش رفت سے بھی آگاہ کیا گیا۔