عالمی یومِ آبادی: وزیراعظم شہباز شریف کا ذمہ دارانہ آبادی کی منصوبہ بندی اور نوجوانوں کو بااختیار بنانے پر زور

وزیراعظم شہباز شریف نے عالمی یومِ آبادی پر اپنے پیغام میں کہا کہ ذمہ دارانہ آبادی کی منصوبہ بندی پائیدار ترقی، وسائل کی منصفانہ تقسیم اور قومی خوشحالی کے لیے ناگزیر ہے۔ انہوں نے نوجوانوں میں سرمایہ کاری، خواتین کو بااختیار بنانے اور آبادی سے متعلق چیلنجز سے نمٹنے کے لیے قومی سطح پر مشترکہ اقدامات کی ضرورت پر زور دیا۔

اسلام آباد: وزیراعظم محمد شہباز شریف نے عالمی یومِ آبادی کے موقع پر اپنے پیغام میں کہا ہے کہ پاکستان پائیدار آبادی، متوازن ترقی اور خوشحالی کے عزم کی تجدید کے لیے عالمی برادری کے ساتھ یہ دن منا رہا ہے۔ انہوں نے کہا کہ ذمہ دارانہ آبادی کی منصوبہ بندی ہی ایک فلاحی معاشرے، وسائل کی منصفانہ تقسیم اور پائیدار ترقی کی ضمانت ہے۔

وزیراعظم نے کہا کہ اس سال عالمی یومِ آبادی "آج اور مستقبل میں نوجوانوں کی امیدوں اور امنگوں کو حقیقت میں بدلنا" کے عنوان سے منایا جا رہا ہے، جو اس حقیقت کی عکاسی کرتا ہے کہ نوجوان ایک خوشحال مستقبل کی تشکیل میں کلیدی کردار رکھتے ہیں۔ انہوں نے کہا کہ نئی نسل کے لیے سازگار ماحول کی فراہمی ہم سب کی مشترکہ ذمہ داری ہے۔

شہباز شریف نے کہا کہ پاکستان آبادی کے لحاظ سے دنیا کا پانچواں بڑا ملک ہے، جبکہ ملک کی 65 فیصد سے زائد آبادی 30 سال سے کم عمر نوجوانوں پر مشتمل ہے، جو ایک قیمتی قومی سرمایہ اور معاشی و سماجی ترقی کا اہم ذریعہ ہے۔ تاہم، انہوں نے نشاندہی کی کہ 2.55 فیصد سالانہ آبادی میں اضافہ روزگار، تعلیم، صحت، رہائش، غذائی تحفظ، بنیادی شہری سہولیات اور ماحولیاتی پائیداری جیسے شعبوں میں بڑے چیلنجز بھی پیدا کر رہا ہے۔

وزیراعظم نے کہا کہ نوجوانوں کی صلاحیتوں سے بھرپور استفادہ کرنے کے لیے قومی وسائل میں مسلسل سرمایہ کاری اور جامع حکمت عملی ناگزیر ہے۔ انہوں نے بتایا کہ وفاقی حکومت کی نگرانی میں قومی کونسل برائے آبادی (National Council for Population) قائم کی گئی ہے، جو وفاق اور صوبوں کے درمیان پالیسی ہم آہنگی، قومی آبادی پروگرام پر عملدرآمد اور مؤثر آبادی منصوبہ بندی کے لیے رہنمائی فراہم کرے گی۔

انہوں نے کہا کہ حکومت خواتین کو بااختیار بنانے، انسانی وسائل کی ترقی، تعلیم، صحت، معاشی شمولیت اور خواتین و بچیوں سمیت معاشرے کے تمام طبقات کو مساوی مواقع فراہم کرنے کے لیے اقدامات کر رہی ہے۔ وزیراعظم یوتھ پروگرام سمیت مختلف قومی منصوبوں کا مقصد نوجوانوں کو باصلاحیت، ذمہ دار اور بااختیار شہری بنانا ہے۔

وزیراعظم شہباز شریف نے وفاقی و صوبائی حکومتوں، ارکان پارلیمنٹ، ترقیاتی شراکت داروں، سول سوسائٹی، جامعات، نجی شعبے، علما، میڈیا اور مقامی برادریوں پر زور دیا کہ وہ آبادی سے متعلق آگاہی، ذمہ دارانہ والدین، صنفی مساوات اور پائیدار ترقی کے فروغ کے لیے اپنا مؤثر کردار ادا کریں۔ انہوں نے اس امید کا اظہار کیا کہ اجتماعی کوششوں سے پاکستان اپنی نوجوان آبادی کی صلاحیتوں کو قومی طاقت میں تبدیل کرتے ہوئے ایک مضبوط، مستحکم اور خوشحال مستقبل کی بنیاد رکھے گا۔