محکمہ موسمیات کی 18 سے 25 جولائی تک شدید بارشوں کی پیش گوئی، متعدد علاقوں کے لیے الرٹ جاری

محکمہ موسمیات نے 18 سے 25 جولائی کے دوران ملک کے مختلف علاقوں میں گرج چمک، تیز ہواؤں اور شدید بارشوں کی پیش گوئی کرتے ہوئے عوام کو محتاط رہنے کی ہدایت کی ہے۔ شدید بارشوں کے باعث مقامی سیلاب، شہری علاقوں میں اربن فلڈنگ، لینڈ سلائیڈنگ اور کمزور تعمیرات کو نقصان پہنچنے کا خدشہ ظاہر کیا گیا ہے۔

اسلام آباد: محکمہ موسمیات پاکستان (پی ایم ڈی) نے 18 سے 25 جولائی 2026 کے دوران ملک کے شمالی، وسطی اور شمال مشرقی علاقوں میں مون سون بارشوں کے نئے سلسلے کے باعث شدید موسمی صورتحال کی پیش گوئی کرتے ہوئے ایڈوائزری جاری کر دی ہے۔

محکمہ موسمیات کے مطابق مون سون ہواؤں میں شدت اور مغربی ہوا کے نئے سلسلے کے باعث کشمیر، گلگت بلتستان، خیبر پختونخوا، پنجاب، اسلام آباد، شمال مشرقی بلوچستان اور سندھ کے چند علاقوں میں بارش، تیز ہواؤں اور گرج چمک کے ساتھ موسلادھار بارش کا امکان ہے، جبکہ بعض مقامات پر انتہائی شدید بارش بھی متوقع ہے۔

ایڈوائزری کے مطابق شدید بارشوں کے باعث مقامی ندی نالوں میں اچانک طغیانی، بڑے شہروں میں شہری سیلاب، پہاڑی علاقوں میں لینڈ سلائیڈنگ اور تیز ہواؤں سے کمزور تعمیرات کو نقصان پہنچنے کا خدشہ ہے۔

محکمہ موسمیات نے عوام، سیاحوں، کاشتکاروں اور متعلقہ اداروں کو ہدایت کی ہے کہ وہ موسم کی تازہ ترین پیش گوئی سے آگاہ رہیں، غیر ضروری سفر سے گریز کریں اور ممکنہ موسمی خطرات سے بچاؤ کے لیے احتیاطی تدابیر اختیار کریں۔