بلوچستان بھر میں انسداد پولیو مہم کامیابی سے جاری

بلوچستان میں انسداد پولیو مہم دوسرے روز بھی بھرپور انداز میں جاری ہے، جس کے تحت پانچ سال سے کم عمر بچوں کو پولیو سے بچاؤ کے قطرے پلائے جا رہے ہیں۔ محکمہ صحت کے مطابق صوبے بھر میں 26 لاکھ سے زائد بچوں کو ویکسین پلانے کا ہدف مقرر کیا گیا ہے جبکہ گزشتہ 15 ماہ کے دوران بلوچستان میں پولیو کا کوئی کیس رپورٹ نہیں ہوا۔

رپورٹ: سیدہ نتاشا

بلوچستان بھر میں انسداد پولیو مہم دوسرے روز بھی کامیابی کے ساتھ جاری ہے، جس کا مقصد پانچ سال سے کم عمر بچوں کو پولیو جیسے موذی مرض سے محفوظ بنانا ہے۔
کوآرڈینیٹر ایمرجنسی آپریشن سینٹر انعام الحق قریشی کے مطابق اس مہم کے دوران صوبے بھر میں 26 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ انہوں نے بتایا کہ اس قومی مہم میں مجموعی طور پر 11 ہزار ٹیمیں حصہ لے رہی ہیں جو گھر گھر جا کر بچوں کو پولیو ویکسین فراہم کر رہی ہیں۔

ان کا کہنا تھا کہ مہم کے دوران 822 فکسڈ ٹیمیں جبکہ 474 ٹرانزٹ ٹیمیں بھی تعینات کی گئی ہیں جو بس اڈوں، ریلوے اسٹیشنز اور دیگر اہم مقامات پر بچوں کو پولیو سے بچاؤ کے قطرے پلائیں گی۔
انعام الحق قریشی نے بتایا کہ یہ ایک خوش آئند امر ہے کہ گزشتہ 15 ماہ کے دوران بلوچستان میں پولیو کا کوئی کیس رپورٹ نہیں ہوا، تاہم گزشتہ سال ملک بھر میں مجموعی طور پر 31 پولیو کیسز سامنے آئے تھے۔ انہوں نے مزید بتایا کہ بلوچستان کے 23 اضلاع میں سے صرف 2 اضلاع کے ماحولیاتی نمونوں میں پولیو وائرس کی موجودگی پائی گئی ہے، جس کے پیش نظر انسداد پولیو مہم کو مزید مؤثر اور مربوط بنایا گیا ہے۔
محکمہ صحت نے والدین سے اپیل کی ہے کہ وہ پولیو ٹیموں کے ساتھ بھرپور تعاون کریں اور اپنے بچوں کو ہر مہم کے دوران پولیو کے قطرے ضرور پلوائیں تاکہ بلوچستان اور پورے ملک کو پولیو فری بنایا جا سکے۔