گورنر ہاؤس کوئٹہ میں صدارتی سول اعزازات کی پروقار تقریب

کوئٹہ کے گورنر ہاؤس میں صدارتی سول اعزازات کی تقریب منعقد ہوئی جہاں گورنر بلوچستان شیخ جعفر مندوخیل نے صدرِ پاکستان کی جانب سے مختلف شعبوں میں نمایاں خدمات انجام دینے والی شخصیات میں قومی اعزازات تقسیم کیے۔ تقریب میں شہداء سمیت تیرہ شخصیات کو ستارۂ شجاعت، ستارۂ امتیاز، تمغۂ شجاعت اور تمغۂ امتیاز سمیت مختلف اعزازات سے نوازا گیا۔ گورنر بلوچستان نے امن و امان، قومی خدمات اور پاکستان کے سفارتی کردار پر بھی گفتگو کی۔

رپورٹ:سیدہ نتاشا
کوئٹہ کے گورنر ہاؤس میں صدارتی سول اعزازات کی پروقار تقریب کا انعقاد کیا گیا، جہاں گورنر بلوچستان شیخ جعفر خان مندوخیل نے صدرِ پاکستان کی جانب سے مختلف شعبہ ہائے زندگی سے تعلق رکھنے والی نمایاں شخصیات میں قومی اعزازات تقسیم کیے۔ تقریب میں وزراء، اراکین اسمبلی، اعلیٰ حکام اور مختلف شعبوں سے تعلق رکھنے والی اہم شخصیات نے شرکت کی۔

تقریب کے دوران تیرہ شخصیات کو ان کی خدمات کے اعتراف میں قومی اعزازات سے نوازا گیا۔ غلام فرید شہید کو بعد از شہادت ستارۂ شجاعت عطا کیا گیا، جبکہ محمد عبدالکریم ثاقب، سید حبیب اللہ شاہ، عذرا آفتاب اور پروفیسر ڈاکٹر عبدالروف رفیقی کو ستارۂ امتیاز سے نوازا گیا۔
اسی طرح سلطان جاوید جمال، نور محمد بلوچ اور شاہ زیب رند کو حسنِ کارکردگی کے اعزازات دیے گئے، جبکہ مظفر حسین جمالی شہید کو بعد از شہادت تمغۂ شجاعت سے نوازا گیا۔ پروفیسر ڈاکٹر نقیب اللہ اچکزئی، پروفیسر ڈاکٹر خالد حفیظ، اللہ ڈینو اور فضل محمد کو تمغۂ امتیاز سے سرفراز کیا گیا۔
تقریب کے بعد میڈیا سے گفتگو کرتے ہوئے گورنر بلوچستان شیخ جعفر مندوخیل نے کہا کہ ایوارڈز کی تقسیم دراصل خدمات کے اعتراف اور عزت افزائی کی ایک خوبصورت روایت ہے۔ انہوں نے کہا کہ بلوچستان میں امن و امان کی صورتحال خصوصی توجہ کی متقاضی ہے اور قیامِ امن کے لیے مختلف پروگرامز پر کام جاری ہے۔
گورنر بلوچستان نے ایران اور امریکہ کے درمیان پاکستان کے ثالثی کردار کو بھی سراہتے ہوئے کہا کہ پاکستان نے بہترین سفارتی کردار ادا کیا، جو قابلِ تعریف ہے۔

#PresidentialAwards #CivilAwards #GovernorHouseQuetta #Balochistan #NationalHonours #Pakistan #SheikhJaffarMandokhail #StarOfExcellence #TamghaEMtiaz #Quetta #PakistanAwards #NationalRecognition #BalochistanNews #NatashaTheVoice