صوبائی وزیرِ صحت بلوچستان کا جی ڈی اے ہسپتال گوادر کا دورہ، طبی سہولیات کا جائزہ

صوبائی وزیرِ صحت بلوچستان بخت محمد کاکڑ نے جی ڈی اے ہسپتال گوادر کا دورہ کیا اور فراہم کی جانے والی طبی سہولیات کا جائزہ لیا۔ اس موقع پر انہوں نے انتظامیہ کو سہولیات مزید بہتر بنانے کی ہدایات دیں اور مکران ڈویژن میں صحت کے شعبے میں مکمل تعاون کی یقین دہانی کروائی۔

رپورٹ: سیدہ نتاشا

صوبائی وزیرِ صحت بلوچستان بخت محمد کاکڑ نے گوادر میں واقع جی ڈی اے ہسپتال کا دورہ کیا، جہاں انہوں نے ہسپتال میں فراہم کی جانے والی طبی سہولیات، مریضوں کو دی جانے والی خدمات اور انتظامی امور کا تفصیلی جائزہ لیا۔ دورے کے دوران ہسپتال انتظامیہ نے وزیرِ صحت کو مختلف شعبہ جات سے متعلق بریفنگ دی۔
اس موقع پر رکنِ صوبائی اسمبلی گوادر مولانا ہدایت الرحمان بھی صوبائی وزیرِ صحت کے ہمراہ موجود تھے۔ بخت محمد کاکڑ نے ہسپتال انتظامیہ کو ہدایت کی کہ مریضوں کو بہتر، معیاری اور بروقت طبی سہولیات کی فراہمی کو یقینی بنایا جائے۔

صوبائی وزیرِ صحت نے ایم پی اے گوادر کو یقین دہانی کرواتے ہوئے کہا کہ حکومتِ بلوچستان ان کے مکمل تعاون سے مکران ڈویژن میں صحت کے شعبے کو مزید مؤثر بنانے کے لیے عملی اقدامات کرے گی۔ انہوں نے کہا کہ گوادر اور مکران ڈویژن کے عوام کو معیاری طبی سہولیات فراہم کرنا حکومتِ بلوچستان کی اولین ترجیحات میں شامل ہے اور اس مقصد کے لیے تمام دستیاب وسائل بروئے کار لائے جائیں گے۔