کوئٹہ: یومِ عاشورہ کا مرکزی جلوس سخت سکیورٹی میں برآمد، فضائی و روبوٹک نگرانی

کوئٹہ: یومِ عاشورہ کے موقع پر کوئٹہ میں مرکزی جلوس اور عزاداری کے اجتماعات کے پرامن انعقاد کو یقینی بنانے کے لیے سیکیورٹی کے غیر معمولی انتظامات کیے گئے ہیں۔ شہر بھر میں تین ہزار سے زائد پولیس اہلکار اور دیگر قانون نافذ کرنے والے اداروں کے اہلکار تعینات کیے گئے ہیں جبکہ 30 خصوصی دستے بھی مختلف مقامات پر گشت اور نگرانی کے فرائض انجام دے رہے ہیں۔

سیکیورٹی حکام کے مطابق جلوس کی نگرانی فضائی سرویلنس کے ذریعے کی جا رہی ہے اور جدید ٹیکنالوجی سے لیس روبوٹ کو بھی سیکیورٹی پلان کا حصہ بنایا گیا ہے تاکہ کسی بھی مشتبہ شے یا صورتحال کا بروقت جائزہ لیا جا سکے۔ سیکیورٹی بیورو اور بم ڈسپوزل عملہ جلوس کے راستوں اور اطراف کے علاقوں کی مسلسل تلاشی اور سوئپنگ کر رہا ہے۔

انسپکٹر جنرل پولیس بلوچستان کی ہدایات پر ضلعی انتظامیہ، پولیس اور دیگر متعلقہ اداروں نے مشترکہ حکمت عملی کے تحت جامع انتظامات کیے ہیں۔ جلوس کے راستوں پر عزاداروں کی سہولت کے لیے سبیلیں قائم کی گئی ہیں جبکہ امن و امان کے قیام اور انتظامات کو مؤثر بنانے کے لیے انجمن تاجران نے بھی بھرپور تعاون فراہم کیا ہے۔

مرکزی جلوس نمازِ جمعہ کے بعد امام بارگاہ ناصر العزا سے برآمد ہوا اور اپنے روایتی راستوں سے ہوتا ہوا مختلف مقامات سے گزرا۔ جلوس کے تمام راستوں پر سخت حفاظتی حصار قائم کیا گیا تھا اور داخلی و خارجی راستوں پر چیکنگ کے خصوصی انتظامات کیے گئے تھے۔ حکام کے مطابق سیکیورٹی پلان پر مؤثر انداز میں عملدرآمد جاری ہے تاکہ عزادارانِ امام حسینؓ اپنے مذہبی فرائض پرسکون اور محفوظ ماحول میں ادا کر سکیں۔

Keywords : Ashura Procession, Quetta Security, Aerial Surveillance, Robotic Monitoring