کوئٹہ آتشزدگی واقعہ – لیاقت بازار پلازا

کوئٹہ کے مصروف تجارتی علاقے لیاقت بازار میں لگنے والی آگ پر کئی گھنٹوں کی جدوجہد کے بعد قابو پا لیا گیا۔ فائر بریگیڈ کی 13 گاڑیوں اور 70 سے زائد اہلکاروں نے آگ بجانے کے عمل میں حصہ لیا، جبکہ کولنگ کا عمل تاحال جاری ہے۔

رپورٹ: سیدہ نتاشا

کوئٹہ: شہر کے مصروف تجارتی مرکز لیاقت بازار مارکیٹ میں واقع ایک پلازا میں لگنے والی شدید آگ پر قابو پا لیا گیا ہے، تاہم فائر بریگیڈ کی جانب سے کولنگ کا عمل جاری ہے تاکہ دوبارہ آگ بھڑکنے کے خدشے کو ختم کیا جا سکے۔
میٹروپولیٹن کارپوریشن فائر سروسز کے مطابق آگ بجھانے کے لیے 13 فائر بریگیڈ گاڑیوں پر مشتمل ٹیم نے حصہ لیا، جس میں 70 سے زائد فائر فائٹرز اور ریسکیو اہلکار شامل تھے۔ فائر بریگیڈ کی گاڑیوں کو کوئٹہ شہر کے 5 پوائنٹ سے فوری طور پر روانہ کیا گیا، جس کی تصدیق عبدالحق اچکزئی نے کی۔

ریسکیو حکام کا کہنا ہے کہ متاثرہ پلازا میں کمپیوٹرز، موبائل فونز، گارمنٹس اور دیگر مختلف نوعیت کی دکانیں قائم تھیں، جس کے باعث آگ تیزی سے پھیل گئی اور بھاری مالی نقصان کا خدشہ ہے۔
ڈائریکٹر فائر آفیسر کے مطابق آگ نے پلازا کے قریب نصب بجلی کے ٹرانسفارمر اور تاروں کو بھی اپنی لپیٹ میں لے لیا تھا، جس کی وجہ سے آگ پر قابو پانے میں شدید مشکلات کا سامنا کرنا پڑا۔ بجلی کی فراہمی معطل کر کے حفاظتی اقدامات کیے گئے، جس کے بعد فائر فائٹرز نے مؤثر انداز میں کارروائی کرتے ہوئے آگ کو مزید پھیلنے سے روک لیا۔
حکام کے مطابق واقعے میں کسی جانی نقصان کی اطلاع نہیں ملی، جبکہ نقصان کا تخمینہ لگانے اور آگ لگنے کی وجوہات جاننے کے لیے تحقیقات کا آغاز کر دیا گیا ہے۔