کوئٹہ شدید گرمی کی لپیٹ میں، 30 جون کا درجہ حرارت دو دہائیوں پرانے ریکارڈ کے برابر

محکمہ موسمیات کے مطابق 30 جون کو کوئٹہ میں درجہ حرارت 41.5 ڈگری سینٹی گریڈ ریکارڈ کیا گیا، جو 4 جون 2005 کے ریکارڈ کے برابر ہے۔ محکمہ نے پیش گوئی کی ہے کہ جولائی میں گرمی کی شدت مزید بڑھنے کا امکان ہے۔

کوئٹہ: محکمہ موسمیات کی جاری کردہ رپورٹ کے مطابق صوبائی دارالحکومت کوئٹہ شدید گرمی کی لپیٹ میں ہے، جہاں 30 جون کو درجہ حرارت 41.5 ڈگری سینٹی گریڈ ریکارڈ کیا گیا، جو 4 جون 2005 کو ریکارڈ کیے گئے 41.5 ڈگری سینٹی گریڈ کے برابر ہے۔

محکمہ موسمیات کے اعداد و شمار کے مطابق جولائی 1998 میں کوئٹہ کا درجہ حرارت 42 ڈگری سینٹی گریڈ ریکارڈ کیا گیا تھا، جو اس مہینے کے نمایاں ریکارڈز میں شامل ہے۔ اسی طرح اگست 1970 میں 40.6 ڈگری سینٹی گریڈ، 11 مئی 2000 کو 39.4 ڈگری سینٹی گریڈ اور یکم ستمبر 1970 کو 38.3 ڈگری سینٹی گریڈ درجہ حرارت ریکارڈ کیا گیا تھا۔

محکمہ موسمیات نے پیش گوئی کی ہے کہ جولائی کے دوران گرمی کی شدت میں مزید اضافہ ہونے کا امکان ہے۔ ماہرین نے شہریوں کو غیر ضروری طور پر دھوپ میں نکلنے سے گریز کرنے، پانی کا زیادہ استعمال کرنے اور شدید گرمی کے دوران بچوں، بزرگوں اور بیمار افراد کا خصوصی خیال رکھنے کی ہدایت کی ہے۔