بلوچستان میں بارش اور برفباری سے کوئٹہ سمیت مختلف علاقوں میں سردی کی شدت میں اضافہ

بلوچستان کے مختلف علاقوں میں بارش اور برفباری کے باعث سردی کی شدت میں اضافہ ہو گیا ہے۔ کوئٹہ، زیارت، خوجک پاس اور شمالی علاقوں میں موسم کی خرابی سے معمولاتِ زندگی متاثر ہوئے ہیں جبکہ برف ہٹانے کا عمل جاری ہے۔ محکمہ موسمیات نے آئندہ دنوں میں مزید بارش اور برفباری کا امکان ظاہر کیا ہے۔

بلوچستان میں بارش اور برفباری، کوئٹہ سمیت مختلف علاقوں میں سردی کی شدت میں اضافہ

رپورٹ : عروبہ شہزاد

22 جنوری ، 2025 کو وادیٔ کوئٹہ سمیت بلوچستان کے مختلف علاقوں میں بارش اور برفباری کا سلسلہ جاری ہے۔ کوئٹہ میں تیز ہواؤں کے ساتھ بارش کا آغاز رات گئے ہوا جو وقفے وقفے سے جاری رہا۔ صوبے کے متعدد علاقوں میں رات سے بارش کا سلسلہ برقرار ہے، جبکہ زیارت، کان مہترزئی، مسلم باغ، توبہ کاکڑی، توبہ اچکزئی اور خوجک پاس پر بارش کے ساتھ برفباری بھی ریکارڈ کی گئی ہے۔

بارش اور برفباری کے باعث کوئٹہ اور دیگر متاثرہ علاقوں میں سردی کی شدت میں نمایاں اضافہ ہو گیا ہے، جس سے معمولاتِ زندگی متاثر ہو رہے ہیں۔ خوجک پاس اور شمالی علاقوں میں برف جمع ہونے کے باعث آمدورفت میں مشکلات کا سامنا ہے۔ نیشنل ہائی وے اتھارٹی (این ایچ اے) اور صوبائی ڈیزاسٹر مینجمنٹ اتھارٹی (پی ڈی ایم اے) کی جانب سے ہائی ویز سے برف ہٹانے کا عمل جاری ہے تاکہ ٹریفک کی روانی بحال رکھی جا سکے۔
محکمہ موسمیات کے مطابق آئندہ 48 گھنٹوں میں بعض علاقوں میں مزید بارش اور برفباری کا امکان ہے، جبکہ شہریوں کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔