دانہ سر بس حادثہ: ژوب میں ریسکیو اور امدادی کارروائیاں جاری

دانہ سر کے مقام پر پیش آنے والے مسافر بس حادثے کے بعد حکومت بلوچستان اور خیبرپختونخوا کے ادارے مشترکہ طور پر امدادی کارروائیوں میں مصروف ہیں۔ زخمیوں کو ٹراما سینٹر ژوب منتقل کیا جا رہا ہے، جبکہ متعلقہ حکام کے مطابق تمام متاثرین کو امداد کی فراہمی تک ریسکیو آپریشن جاری رہے گا۔

ژوب: دانہ سر کے مقام پر مسافر بس حادثے کے بعد حکومت بلوچستان اور خیبرپختونخوا حکومت کی جانب سے مشترکہ ریسکیو اور امدادی سرگرمیاں جاری ہیں۔ وزیراعلیٰ بلوچستان میر سرفراز بگٹی کی ہدایت پر پی ڈی ایم اے، محکمہ صحت، ضلعی انتظامیہ، ایف سی اور دیگر متعلقہ ادارے امدادی کارروائیوں میں مصروف ہیں۔

متعدد ایمبولینسز کے ذریعے زخمیوں کو فوری طور پر ٹراما سینٹر ژوب منتقل کیا جا رہا ہے، جہاں طبی عملہ انہیں علاج معالجے کی سہولیات فراہم کر رہا ہے۔

معاونِ خصوصی برائے سیاسی و میڈیا امور شاہد رند نے کہا کہ تمام متعلقہ ادارے مکمل ہم آہنگی کے ساتھ ریسکیو اور ریلیف آپریشن جاری رکھے ہوئے ہیں اور زخمیوں کے علاج میں کسی قسم کی غفلت برداشت نہیں کی جائے گی۔

انہوں نے ریسکیو سرگرمیوں میں تعاون پر حکومت خیبرپختونخوا، ضلعی انتظامیہ، ریسکیو اداروں اور طبی ٹیموں کا شکریہ ادا کرتے ہوئے کہا کہ حکومت بلوچستان جاں بحق افراد کے لواحقین کے غم میں برابر کی شریک ہے، جبکہ وزیراعلیٰ میر سرفراز بگٹی خود صورتحال کی مسلسل نگرانی کر رہے ہیں۔ انہوں نے کہا کہ تمام متاثرین کو مکمل امداد کی فراہمی تک ریسکیو اور ریلیف آپریشن جاری رہے گا۔