بارکھان اور گردونواح میں دو زلزلے، تین افراد زخمی، متعدد مکانات کو نقصان

کوئٹہ: بلوچستان کے ضلع بارکھان اور اس سے ملحقہ علاقوں میں ہفتے کے روز دو زلزلوں کے جھٹکے محسوس کیے گئے، جن کے نتیجے میں کم از کم تین افراد زخمی ہو گئے جبکہ متعدد کچے مکانات کو نقصان پہنچا۔

صوبائی ڈیزاسٹر مینجمنٹ اتھارٹی (پی ڈی ایم اے) اور نیشنل سیزمک مانیٹرنگ سینٹر کے مطابق پہلے زلزلے کی شدت 5.2 ریکارڈ کی گئی، جس کا مرکز بارکھان کے شمال مشرق میں 52 کلومیٹر دور واقع تھا جبکہ اس کی گہرائی 19 کلومیٹر تھی۔ اس سے قبل اسی علاقے میں 4.3 شدت کا ایک اور زلزلہ بھی آیا جس کی گہرائی 42 کلومیٹر ریکارڈ کی گئی۔

زلزلے کے جھٹکے بارکھان، رکھنی، کوہلو، موسیٰ خیل اور گردونواح کے علاقوں میں بھی محسوس کیے گئے، جس سے لوگوں میں خوف و ہراس پھیل گیا اور شہری گھروں سے نکل کر کھلے مقامات پر جمع ہوگئے۔

پی ڈی ایم اے کے مطابق موسیٰ خیل میں زلزلے کے باعث ایک دکان کی چھت گرنے سے دو مزدور زخمی ہوگئے، جبکہ کنگری کے شمال مغربی علاقے میں ایک مکان منہدم ہونے سے فضل نامی شخص زخمی ہوا۔

اطلاعات ملتے ہی پی ڈی ایم اے اور ضلعی انتظامیہ کے حکام متاثرہ علاقوں میں پہنچ گئے اور امدادی سرگرمیاں شروع کر دیں۔ مقامی انتظامیہ کے مطابق متعدد کچے گھروں کی دیواروں میں دراڑیں پڑ گئی ہیں، جبکہ خوف کے باعث بڑی تعداد میں لوگوں نے اپنے گھروں کو چھوڑ کر عارضی خیمے نصب کر لیے ہیں۔

واضح رہے کہ جمعہ کے روز بھی اسی خطے میں 5.1 شدت کا زلزلہ محسوس کیا گیا تھا، جس کا مرکز کوہلو کے شمال مشرق میں واقع تھا اور اس کے جھٹکے ژوب، بارکھان اور رکھنی سمیت مختلف علاقوں میں محسوس کیے گئے تھے۔ حکام صورتحال کا جائزہ لے رہے ہیں اور متاثرہ علاقوں میں نقصانات کا تخمینہ لگانے کا عمل جاری ہے۔