یو این ایچ سی آر کے تعاون سے بلوچستان میں تحفظ و جوابدہی پر تربیتی سیشن

کوئٹہ: بلوچستان رورل سپورٹ پروگرام (بی آر ایس پی) میں جنسی استحصال اور بدسلوکی سے تحفظ (پی ایس ای اے) سے متعلق ایک تربیتی سیشن منعقد کیا گیا، جس کا مقصد تحفظ، جوابدہی اور اخلاقی طرز عمل کے فروغ کے حوالے سے شرکاء کی استعداد کار میں اضافہ کرنا تھا۔

یہ تربیتی سیشن اقوام متحدہ کے ادارہ برائے مہاجرین (یو این ایچ سی آر) پاکستان کے مالی تعاون سے جاری منصوبے ’’بلوچستان کے پانچ اضلاع اور شہری آبادیوں میں صنفی بنیاد پر تشدد کی روک تھام اور اس کے تدارک‘‘ کے تحت منعقد کیا گیا۔ سیشن کی تربیت یو این ایچ سی آر کی سینئر پروٹیکشن اسسٹنٹ طاہرہ اعوان نے فراہم کی۔

تربیتی سیشن کے دوران شرکاء کو صنف، صنفی بنیاد پر تشدد (جی بی وی)، جنسی استحصال اور بدسلوکی سے تحفظ (پی ایس ای اے) کے اصولوں، شکایات اور رپورٹنگ کے طریقہ کار، متاثرہ فرد پر مرکوز معاونتی حکمت عملیوں اور تمام افراد کے وقار، احترام اور تحفظ کو یقینی بنانے کی اجتماعی ذمہ داری سے متعلق آگاہی فراہم کی گئی۔

شرکاء نے سیشن کو مفید قرار دیتے ہوئے اس عزم کا اظہار کیا کہ وہ تحفظ، جوابدہی اور پیشہ ورانہ و اخلاقی رویوں کے فروغ میں اپنا مؤثر کردار ادا کریں گے۔