پاکستان کے بجلی ترسیلی نظام کی بہتری کے لیے عالمی بینک کی 375.9 ملین ڈالر کی منظوری

اسلام آباد: عالمی بینک کے بورڈ آف ایگزیکٹو ڈائریکٹرز نے پاکستان کے قومی بجلی ترسیلی نظام کو مضبوط بنانے کے لیے 375.9 ملین امریکی ڈالر کے گرڈ اسٹیبلیٹی انہانسمنٹ پراجیکٹ کی منظوری دے دی ہے۔

عالمی بینک کے مطابق یہ منصوبہ "بوسٹنگ انرجی سیکیورٹی تھرو ٹرانسمیشن اِن پاکستان (بیسٹ-پاک)" پروگرام کے تحت شروع کیا جا رہا ہے، جو 10 سالہ پروگرام کا پہلا مرحلہ ہے۔ اس کا مقصد بجلی کے ترسیلی نظام کو جدید بنانا، بجلی کی بندش میں کمی لانا اور قابلِ تجدید توانائی کو قومی گرڈ میں مؤثر انداز میں شامل کرنا ہے۔

منصوبے کے تحت اہم گرڈ اسٹیشنز پر جدید آلات نصب کیے جائیں گے، جس سے بجلی کی ترسیل مزید مستحکم ہوگی۔ اس اقدام کے ذریعے جنوبی پاکستان میں موجود 640 میگاواٹ ہوا سے پیدا ہونے والی بجلی قومی گرڈ میں شامل کی جا سکے گی، جبکہ 491 میگاواٹ نجی شعبے کے قابلِ تجدید توانائی منصوبوں کو بھی قومی گرڈ سے منسلک کرنے میں مدد ملے گی۔

عالمی بینک کا کہنا ہے کہ یہ منصوبہ پاکستان کو 2030 تک بجلی کے مجموعی نظام میں 60 فیصد قابلِ تجدید توانائی کے قومی ہدف کے حصول میں معاون ثابت ہوگا۔ منصوبے کے نتیجے میں سالانہ تقریباً 8 لاکھ 32 ہزار 500 ٹن کاربن ڈائی آکسائیڈ کے اخراج میں کمی متوقع ہے۔

منصوبے میں موسمیاتی تبدیلیوں کے اثرات کو مدنظر رکھتے ہوئے ایسا انفراسٹرکچر اور ایسے آلات نصب کیے جائیں گے جو سیلاب اور 55 ڈگری سینٹی گریڈ تک کے درجہ حرارت میں بھی مؤثر انداز میں کام کر سکیں۔ عالمی بینک کے مطابق یہ منصوبہ نیشنل ٹرانسمیشن اینڈ ڈسپیچ کمپنی (این ٹی ڈی سی) میں جاری اصلاحات، بہتر حکمرانی، ادارہ جاتی استعداد اور بجلی کے شعبے کی طویل المدتی پائیداری کو بھی فروغ دے گا۔

Keywords: World Bank, Power Transmission, Energy Security, Renewable Energy