زیارت: برف ہٹانے کا آپریشن کامیابی سے مکمل، رابطہ سڑکیں بحال

ضلع زیارت میں برف باری کے بعد کلی مردار کچھ روڈ اور ڈومیارہ روڈ کو کامیابی سے برف سے پاک کر کے آمدورفت کے لیے بحال کر دیا گیا۔ ضلعی انتظامیہ کی بروقت کارروائی سے مقامی آبادی اور مسافروں کو سہولت میسر آ گئی۔

رپورٹ: سیدہ نتاشا

زیارت میں شدید برف باری کے باعث بند ہونے والی رابطہ سڑکیں ضلعی انتظامیہ کی بروقت اور مؤثر کارروائی سے بحال کر دی گئی ہیں۔ ڈپٹی کمشنر زیارت عبد القدوس اچکزئی کی خصوصی ہدایت پر اسسٹنٹ کمشنر زیارت سجادالرحمان کوڑو نے اپنی ٹیم کے ہمراہ محکمہ سی اینڈ ڈبلیو، میونسپل کمیٹی، پی ایچ ای اور پروجیکٹ ڈائریکٹر زیڈ ڈی پی کے تعاون سے کلی مردار کچھ روڈ اور ڈومیارہ روڈ کو برف سے صاف کرنے کے لیے بھرپور آپریشن کیا۔

یہ آپریشن صبح 8 بجے سے رات 9 بجے تک جاری رہا، جس میں روسی ٹریکٹروں کی مدد سے برف ہٹائی گئی۔ شدید سردی اور سڑکوں پر پھسلن کے خطرے کے پیش نظر سرخ نمک کا بھرپور چھڑکاؤ بھی کیا گیا تاکہ حادثات سے بچا جا سکے۔
انتظامیہ کی مسلسل کوششوں کے نتیجے میں الحمدللہ دونوں سڑکیں مکمل طور پر بحال کر کے آمدورفت کے لیے کھول دی گئی ہیں۔ کلی مردار کچھ میں آباد تقریباً 15 گھروں کے مکینوں کے لیے ہسپتال اور بازار تک رسائی آسان ہو گئی ہے۔ اسی طرح ضلع زیارت کی وہ بڑی آبادی جو اس وقت ضلع ہرنائی منتقل ہو چکی ہے اور ڈومیارہ کے راستے سفر کرتی ہے، ان کے لیے بھی آمدورفت بحال ہو گئی ہے، جس سے دیرینہ مسئلہ حل ہو گیا۔
اس کامیاب اقدام پر عوامی حلقوں نے ضلعی انتظامیہ کی کاوشوں کو سراہتے ہوئے شکریہ ادا کیا ہے۔