ایپل نے نئی مصنوعی ذہانت پر مبنی سری ایپ متعارف کرا دی

ایپل نے اپنی سالانہ ورلڈ وائیڈ ڈویلپرز کانفرنس (WWDC 2026) میں مصنوعی ذہانت (AI) سے مزین نئی سری ایپ (Siri App) متعارف کرا دی، جسے کمپنی کی تاریخ میں ڈیجیٹل اسسٹنٹ کی سب سے بڑی اور نمایاں اپ گریڈ قرار دیا جا رہا ہے۔

ٹیکنالوجی ماہرین کے مطابق یہ سری ایپ ایپل کی مصنوعی ذہانت کے شعبے میں ایک بڑی پیش رفت ہے، جو صارفین کو زیادہ منظم، ذاتی نوعیت کا اور جدید اے آئی تجربہ فراہم کرے گی۔

نئی سری ایپ میں ملٹی فنکشن انٹرفیس شامل کیا گیا ہے، جس کے ذریعے صارفین تحریری پیغامات بھیجنے، تصاویر اور دستاویزات اپ لوڈ کرنے اور وائس موڈ کے ذریعے براہِ راست سری سے بات چیت کرنے کے قابل ہوں گے۔ اس نئی اپ ڈیٹ کے ساتھ سری کی صلاحیتیں جدید اے آئی اسسٹنٹس کے برابر لانے کی کوشش کی گئی ہے۔

ایپ صارفین کو اپنی سابقہ گفتگوؤں کو محفوظ رکھنے، دوبارہ دیکھنے اور منظم انداز میں استعمال کرنے کی سہولت فراہم کرے گی۔ جدید اے آئی چیٹ بوٹس کی طرح صارفین پرانی چیٹس تک رسائی حاصل کر سکیں گے، جبکہ ایپ ہر گفتگو کا مختصر خلاصہ بھی پیش کرے گی تاکہ مکمل ریکارڈ پڑھنے کی ضرورت نہ پڑے۔

ایپل کے مطابق سری ایپ آئی فون، آئی پیڈ اور میک سمیت مختلف ایپل ڈیوائسز پر دستیاب ہوگی، جبکہ تمام چیٹس آئی کلاؤڈ کے ذریعے نجی طور پر ہم آہنگ (Sync) کی جائیں گی اور صارفین کی پرائیویسی کو یقینی بنایا جائے گا۔