بلوچستان بجٹ 2026-27: خواتین کی ترقی کے لیے 74 ملین روپے مختص، بااختیاری پر زور

کوئٹہ: حکومت بلوچستان نے مالی سال 2026-27 کے بجٹ میں خواتین کی ترقی اور بااختیاری کے لیے محکمہ ترقیِ نسواں کے لیے 74 ملین روپے مختص کرنے کا اعلان کیا ہے جبکہ 579 ملین روپے غیر ترقیاتی اخراجات کے لیے رکھے گئے ہیں۔

صوبائی وزیر خزانہ میر شعیب نوشیروانی نے بجٹ اجلاس سے خطاب کرتے ہوئے کہا کہ محکمہ ترقیِ نسواں کا بنیادی مقصد خواتین کو بااختیار بنانا اور ان کے حقوق کے تحفظ کے لیے مؤثر اقدامات کرنا ہے۔ انہوں نے کہا کہ خواتین کی شمولیت کے بغیر قومی ترقی اور خوشحالی کا سفر مکمل نہیں ہو سکتا۔

انہوں نے بتایا کہ حکومت خواتین کی معاشی خودمختاری کے لیے عملی اقدامات کر رہی ہے تاکہ انہیں مرکزی دھارے میں شامل کیا جا سکے اور روزگار و کاروباری مواقع فراہم کیے جائیں۔

انہوں نے مزید کہا کہ اس شعبے کی بہتری کے لیے آئندہ مالی سال میں اہم اقدامات کیے جائیں گے، جن کا مقصد خواتین کو معاشی طور پر مضبوط اور خود کفیل بنانا ہے۔