بلوچستان میں لکڑی اور جنگلاتی پیداوار کی نقل و حمل پر 90 روزہ پابندی عائد

کوئٹہ: حکومت بلوچستان نے صوبے بھر میں لکڑی، شہتیروں اور دیگر جنگلاتی پیداوار کی غیر قانونی نقل و حمل کی روک تھام کے لیے فوجداری ضابطہ کار 1898 کی دفعہ 144 کے تحت 90 روز کے لیے ہر قسم کی لکڑی اور جنگلاتی پیداوار کی ترسیل، نقل و حمل اور آمدورفت پر فوری طور پر پابندی عائد کر دی ہے۔

محکمہ داخلہ بلوچستان کی جانب سے جاری کردہ اعلامیے کے مطابق یہ فیصلہ عوامی مفاد میں جنگلاتی وسائل کے تحفظ اور ان کی غیر قانونی نقل و حمل کی مؤثر نگرانی کے لیے کیا گیا ہے۔ پابندی کے دوران صوبے کے تمام ڈپٹی کمشنرز، اسسٹنٹ کمشنرز، پولیس، فرنٹیئر کور (ایف سی) اور دیگر قانون نافذ کرنے والے اداروں کو اختیار حاصل ہوگا کہ وہ حکم نامے کی خلاف ورزی کرتے ہوئے لکڑی یا جنگلاتی پیداوار لے جانے والی گاڑیوں، ٹرکوں، ٹریلرز یا دیگر ذرائع نقل و حمل کو روک کر اپنی تحویل میں لے سکیں۔

اعلامیے میں کہا گیا ہے کہ حکم نامے کی خلاف ورزی کرنے والوں کے خلاف تعزیراتِ پاکستان کی دفعہ 188 اور دیگر متعلقہ قوانین کے تحت کارروائی کی جائے گی، جبکہ پابندی کے دوران کسی بھی گاڑی یا ضبط شدہ لکڑی کو محض کسی اجازت نامے یا پاس کی بنیاد پر رہا نہیں کیا جائے گا۔

اعلامیے کے مطابق عوامی مفاد یا حکومتی ضروریات کے تحت غیر معمولی حالات میں متعلقہ انتظامی سیکریٹری محکمہ داخلہ کو تحریری درخواست کے ذریعے مخصوص استثنیٰ کی سفارش کر سکتے ہیں، تاہم محکمہ داخلہ کی جانب سے تحریری منظوری ملنے تک پابندی برقرار رہے گی۔