کوئٹہ: مالی سال 27-2026 کے بجٹ میں تعلیم، صحت اور پسماندہ علاقوں کی ترقی کو ترجیح دی جائے گی، وزیراعلیٰ بلوچستان

وزیراعلیٰ بلوچستان میر سرفراز بگٹی کی زیر صدارت بجٹ مشاورتی اجلاس میں مالی سال 27-2026 کے بجٹ میں تعلیم، صحت، روزگار اور پسماندہ علاقوں کی ترقی کو ترجیح دینے پر اتفاق کیا گیا۔ وزیراعلیٰ نے کہا کہ صوبے کے وسائل عوامی فلاح اور متوازن ترقی کے لیے استعمال کیے جائیں گے تاکہ تمام علاقوں کو یکساں ترقی کے مواقع میسر آ سکیں۔

کوئٹہ: وزیراعلیٰ بلوچستان میر سرفراز بگٹی کی زیر صدارت اتحادی پارلیمانی جماعتوں کے رہنماؤں کا اہم اجلاس منعقد ہوا جس میں آئندہ مالی سال 27-2026 کے صوبائی بجٹ، ترقیاتی ترجیحات، عوامی فلاحی منصوبوں اور مجموعی سیاسی صورتحال پر مشاورت کی گئی۔

اجلاس میں اس بات پر اتفاق کیا گیا کہ صوبائی بجٹ کو عوامی ضروریات، زمینی حقائق اور پسماندہ علاقوں کی ترقی کے تقاضوں کے مطابق ترتیب دیا جائے گا۔ شرکاء نے تعلیم، صحت، روزگار کے مواقع اور بنیادی سہولیات کی بہتری کو بجٹ کی اہم ترجیحات قرار دیا۔

وزیراعلیٰ میر سرفراز بگٹی نے کہا کہ صوبے کے وسائل عوامی فلاح و بہبود اور متوازن ترقی کے لیے بروئے کار لائے جائیں گے۔ انہوں نے اس عزم کا اظہار کیا کہ بلوچستان کے تمام علاقوں کو یکساں ترقی کے مواقع فراہم کیے جائیں گے اور باہمی مشاورت سے عوام دوست بجٹ پیش کیا جائے گا۔

دریں اثنا وزیراعلیٰ کی ہدایت پر صوبے میں تعلیمی سہولیات کے فروغ کے لیے 2,029 اسکولوں کی اپ گریڈیشن کا عمل جاری ہے، جبکہ پہلے مرحلے میں 380 اسکولوں میں اضافی تدریسی کمروں کی تعمیر کی جا رہی ہےے۔

صوبے میں جدید ٹیکنالوجی کے استعمال کے ذریعے امن و امان کی صورتحال بہتر بنانے کے لیے اسمارٹ سٹی منصوبوں پر بھی کام جاری ہے۔ اس سلسلے میں مختلف اضلاع میں جدید نگرانی کے نظام نصب کیے جا رہے ہیں تاکہ شہریوں کو محفوظ ماحول فراہم کیا جا سکے۔