بلوچستان کابینہ کا چیف سیکرٹری شکیل قادر خان کو گڈ گورننس اور اصلاحات پر شاندار خراجِ تحسین

کوئٹہ: بلوچستان کابینہ نے چیف سیکرٹری بلوچستان شکیل قادر خان کو بہترین انتظامی کارکردگی، گڈ گورننس کے فروغ اور حکومتی پالیسیوں پر مؤثر و شفاف عملدرآمد کے اعتراف میں زبردست خراجِ تحسین پیش کیا ہے۔

وزیراعلیٰ بلوچستان میر سرفراز بگٹی کی زیر صدارت کابینہ اجلاس میں چیف سیکرٹری کی انتظامی صلاحیتوں، پیشہ ورانہ مہارت اور اصلاحاتی اقدامات کو سراہا گیا۔ اجلاس میں اتفاق کیا گیا کہ شکیل قادر خان نے صوبے میں انتظامی نظم و نسق کی بہتری اور ادارہ جاتی کارکردگی کو مضبوط بنانے میں اہم کردار ادا کیا ہے۔

وزیراعلیٰ نے کہا کہ چیف سیکرٹری اپنی محنت، دیانت اور پیشہ ورانہ صلاحیتوں کے باعث بجٹ کی تیاری کے تمام مراحل میں کلیدی کردار ادا کرتے رہے ہیں۔ انہوں نے شکیل قادر خان کو پاکستان سول سروس کا قابل اور تجربہ کار افسر قرار دیتے ہوئے ان کی خدمات کو سراہا۔

انہوں نے مزید کہا کہ پالیسی سازی حکومت کا اختیار ہے جبکہ ان پر مؤثر اور شفاف عملدرآمد انتظامی اداروں کی ذمہ داری ہے، جس کی تکمیل کو حکومت خصوصی اہمیت دیتی ہے۔

وزیراعلیٰ نے بجٹ کی تیاری میں وزیر خزانہ میر شعیب نوشیروانی، ایڈیشنل چیف سیکرٹری ترقیات زاہد سلیم، سیکرٹری خزانہ جہانگیر خان، پرنسپل سیکرٹری عمران زرکون اور محکمہ خزانہ کی ٹیم کی خدمات کو بھی سراہا۔