بلوچستان میں علاقائی ترقیاتی مراکز کے قیام اور غربت میں کمی کے لیے جامع حکمتِ عملی پر زور

چیف سیکرٹری بلوچستان کی زیرِ صدارت اجلاس میں روزگار، معاشی ترقی، غربت میں کمی اور عوامی فلاح کے لیے جاری حکومتی اقدامات کا جائزہ لیا گیا۔ اجلاس میں علاقائی ترقیاتی مراکز کے قیام، سرمایہ کاری کے فروغ، فنی تربیت اور چھوٹے و درمیانے درجے کے کاروبار کی حوصلہ افزائی پر اتفاق کیا گیا۔

کوئٹہ: چیف سیکرٹری بلوچستان شکیل قادر خان کی زیرِ صدارت اجلاس میں صوبے میں عوامی فلاح، معاشی استحکام اور پائیدار ترقی کے لیے جاری حکومتی اقدامات کا جائزہ لیا گیا۔ اجلاس میں تمام صوبائی انتظامی سیکرٹریز نے شرکت کی، جبکہ ماہرِ معاشیات ڈاکٹر قیصر بنگالی نے بھی شرکت کی۔

چیف سیکرٹری نے کہا کہ حکومت روزگار کے مواقع پیدا کرنے، بنیادی سہولیات تک عوام کی رسائی بہتر بنانے اور پسماندہ علاقوں میں ترقیاتی منصوبوں کے ذریعے عوام کی زندگیوں میں بہتری لانے کے لیے عملی اقدامات کر رہی ہے۔ انہوں نے غربت میں کمی کے لیے مقامی معیشت کے فروغ، فنی تربیت کے پروگراموں، چھوٹے اور درمیانے درجے کے کاروبار (SMEs) کی حوصلہ افزائی اور صوبے بھر میں علاقائی ترقیاتی مراکز کے قیام کی ضرورت پر زور دیا۔

اجلاس سے خطاب کرتے ہوئے ماہرِ معاشیات ڈاکٹر قیصر بنگالی نے کہا کہ بلوچستان میں پائیدار معاشی ترقی کے لیے بڑے پیمانے پر سرمایہ کاری ناگزیر ہے۔ انہوں نے کہا کہ صوبے کے معدنی وسائل، ساحلی پٹی، زرعی صلاحیت اور جغرافیائی اہمیت سے مؤثر منصوبہ بندی اور سرمایہ کاری کے ذریعے بھرپور استفادہ کیا جا سکتا ہے۔

اجلاس میں اس بات پر اتفاق کیا گیا کہ غربت کے خاتمے، عوامی خدمات کی بہتری اور متوازن علاقائی ترقی کے اہداف کے حصول کے لیے حکومتی اداروں، نجی شعبے، ماہرینِ معیشت اور ترقیاتی شراکت داروں کے درمیان مؤثر تعاون ضروری ہے۔