موسیٰ خیل زلزلہ متاثرین کو تنہا نہیں چھوڑیں گے، امداد اور بحالی کا عمل تیز کیا جا رہا ہے: وزیراعلیٰ بلوچستان

وزیراعلیٰ بلوچستان میر سرفراز بگٹی نے کہا کہ موسیٰ خیل کی تحصیل کنگری کے زلزلہ متاثرین کی امداد، بحالی اور تعمیرِ نو کے لیے تمام وسائل بروئے کار لائے جا رہے ہیں۔ انہوں نے متعلقہ اداروں کو ہدایت کی کہ امدادی سرگرمیاں تیز، شفاف اور بلاامتیاز جاری رکھی جائیں تاکہ ہر متاثرہ خاندان تک بروقت مدد پہنچ سکے۔

کوئٹہ: وزیراعلیٰ بلوچستان میر سرفراز بگٹی نے کہا ہے کہ ضلع موسیٰ خیل کی تحصیل کنگری میں حالیہ زلزلے سے متاثرہ خاندانوں کی امداد اور بحالی کے لیے حکومت بلوچستان تمام دستیاب وسائل بروئے کار لا رہی ہے اور متاثرہ عوام کو کسی صورت تنہا نہیں چھوڑا جائے گا۔

وزیراعلیٰ نے سوشل میڈیا پر جاری اپنے پیغام میں کہا کہ حکومت زلزلہ متاثرین کو درپیش مشکلات سے پوری طرح آگاہ ہے اور ان کی فوری مدد، بحالی اور بنیادی سہولیات کی فراہمی حکومت کی اولین ترجیح ہے۔

انہوں نے بتایا کہ ان کی ہدایت پر ریلیف کمشنر اور ڈائریکٹر جنرل پراونشل ڈیزاسٹر مینجمنٹ اتھارٹی (پی ڈی ایم اے) نے زلزلہ متاثرہ علاقوں کا دورہ کیا، نقصانات کا تفصیلی جائزہ لیا اور متاثرہ خاندانوں میں امدادی سامان تقسیم کیا۔

میر سرفراز بگٹی نے کہا کہ متاثرہ علاقوں میں نقصانات کا جامع سروے جاری ہے، جس کی تکمیل کے بعد متاثرہ خاندانوں کی بحالی کے لیے فوری اقدامات کیے جائیں گے۔ انہوں نے کہا کہ حکومت بلوچستان ہر متاثرہ شہری کی مکمل بحالی تک ان کے شانہ بشانہ کھڑی رہے گی۔

وزیراعلیٰ نے ضلعی انتظامیہ، پی ڈی ایم اے اور متعلقہ اداروں کو ہدایت کی کہ امدادی سرگرمیوں میں مزید تیزی لائی جائے اور امداد کی تقسیم شفاف، بروقت اور بلاامتیاز انداز میں یقینی بنائی جائے تاکہ ہر مستحق خاندان تک حکومتی معاونت پہنچ سکے۔

انہوں نے تمام متعلقہ محکموں کو صورتحال کی مسلسل نگرانی اور امدادی کارروائیوں کے مؤثر باہمی رابطے کو یقینی بنانے کی بھی ہدایت کی۔

میر سرفراز بگٹی نے اس عزم کا اعادہ کیا کہ قدرتی آفات سے متاثرہ شہریوں کی ہر ممکن مدد جاری رکھی جائے گی اور زلزلہ متاثرہ علاقوں میں ریلیف، بحالی اور تعمیرِ نو کے تمام اقدامات شفافیت، تیز رفتاری اور مؤثر انداز میں مکمل کیے جائیں گے تاکہ متاثرہ علاقوں میں معمولاتِ زندگی جلد از جلد بحال ہو سکیں۔