بلوچستان میں ڈیجیٹل گورننس کے فروغ کیلئے ڈیجیٹل ایڈورٹائزنگ پالیسی 2026 متعارف

وزیراعلیٰ بلوچستان میر سرفراز بگٹی کی قیادت میں صوبے میں ڈیجیٹل گورننس کے فروغ کے لیے ڈیجیٹل ایڈورٹائزنگ پالیسی 2026 متعارف کرا دی گئی ہے۔ پالیسی کا مقصد ڈیجیٹل میڈیا کے شعبے کو منظم بنانا، نوجوانوں کے لیے نئے مواقع پیدا کرنا اور سرکاری معلومات کی مؤثر ترسیل کو یقینی بنانا ہے۔

وزیراعلیٰ کے وژن کے تحت ڈائریکٹوریٹ جنرل پبلک ریلیشنز (ڈی جی پی آر) بلوچستان نے ایک جدید ڈیجیٹل میڈیا رجسٹریشن پلیٹ فارم قائم کیا ہے، جہاں صوبے بھر کے ڈیجیٹل پبلشرز، کانٹینٹ کریئیٹرز اور سوشل میڈیا انفلوئنسرز اپنی رجسٹریشن کروا سکیں گے۔

حکام کے مطابق رجسٹرڈ افراد حکومتی اقدامات، ترقیاتی منصوبوں اور عوامی فلاح و بہبود کے پروگراموں کو مؤثر انداز میں اجاگر کرنے میں اپنا کردار ادا کریں گے۔ ان کا کہنا ہے کہ یہ اقدام نہ صرف ڈیجیٹل میڈیا کے لیے ایک منظم اور قابلِ اعتماد نظام فراہم کرے گا بلکہ نوجوانوں کے لیے باوقار انداز میں آن لائن آمدنی کے نئے مواقع بھی پیدا کرے گا۔

رجسٹریشن کے خواہشمند افراد ڈی جی پی آر بلوچستان کے آن لائن پورٹل پر اپنی معلومات درج کرکے اس جدید ڈیجیٹل نظام کا حصہ بن سکتے ہیں۔

حکام کا کہنا ہے کہ بلوچستان میں ڈیجیٹل میڈیا کے فروغ اور نوجوانوں کو بااختیار بنانے کی جانب اٹھایا گیا یہ اقدام صوبے میں جدید طرزِ حکمرانی اور ڈیجیٹل ترقی کے ایک نئے باب کا آغاز ثابت ہوگا۔

Keywords : Digital Governance, Digital Advertising Policy 2026, DGPR Balochistan, Youth Empowerment