بلوچستان میں پہلی بار ای-ڈومیسائل اور ای-لوکل سرٹیفکیٹ سسٹم متعارف

حکومت بلوچستان نے صوبے میں پہلی بار ای-ڈومیسائل اور ای-لوکل سرٹیفکیٹ سسٹم متعارف کرا دیا، جسے گڈ گورننس اور ڈیجیٹل اصلاحات کی جانب اہم پیش رفت قرار دیا گیا ہے۔ وزیراعلیٰ میر سرفراز بگٹی کے مطابق نئے نظام سے شفافیت بڑھے گی، جعلی ڈومیسائل کی روک تھام ہوگی اور شہری ملک بھر سے آن لائن درخواست دے سکیں گے۔

کوئٹہ: وزیراعلیٰ بلوچستان میر سرفراز بگٹی نے اعلان کیا ہے کہ حکومت بلوچستان نے صوبے میں پہلی بار ای-ڈومیسائل اور ای-لوکل سرٹیفکیٹ سسٹم متعارف کرا دیا ہے، جسے گڈ گورننس، ڈیجیٹل اصلاحات اور شفاف عوامی خدمات کی فراہمی کی جانب ایک اہم سنگِ میل قرار دیا گیا ہے۔

وزیراعلیٰ نے کہا کہ شہری اب پاکستان بھر میں نادرا سینٹرز، ڈپٹی کمشنر دفاتر اور Pak-ID پلیٹ فارم کے ذریعے ای-ڈومیسائل کے لیے درخواست دے سکیں گے۔ ان کے مطابق جدید نظام سے شفافیت میں اضافہ ہوگا، جعلی ڈومیسائل کی روک تھام ممکن ہوگی اور شہریوں کو فوری، آسان اور مؤثر خدمات میسر آئیں گی۔

میر سرفراز بگٹی نے مزید کہا کہ ای-ڈومیسائل سسٹم سرکاری اداروں کے لیے محفوظ، قابلِ اعتماد اور مؤثر تصدیقی نظام فراہم کرے گا، جبکہ حکومت بلوچستان عوامی خدمات کو جدید، آسان اور شفاف بنانے کے اپنے عزم پر ثابت قدم ہے۔