بلوچستان میں چھوٹے اور درمیانے درجے کے کاروبار کے فروغ کے لیے میچنگ گرانٹس پروگرام

حکومت بلوچستان کے رائز پروگرام کے تحت بلوچستان رورل سپورٹ پروگرام نے مائیکرو، اسمال اور میڈیم کاروباری اداروں کی معاونت کے لیے میچنگ گرانٹس پروگرام متعارف کرایا ہے۔ اس اقدام کا مقصد روزگار کے مواقع میں اضافہ، مقامی معیشت کو مستحکم کرنا اور مختلف کاروباری شعبوں کی ترقی کو فروغ دینا ہے۔

کوئٹہ: حکومت بلوچستان کے ریزیلینس، انٹیگریشن اینڈ سوشیو اکنامک ایمپاورمنٹ (رائز) پروگرام کے تحت بلوچستان رورل سپورٹ پروگرام (بی آر ایس پی) کی جانب سے مائیکرو، اسمال اینڈ میڈیم انٹرپرائزز (ایم ایس ایم ایز) کے لیے میچنگ گرانٹس پروگرام متعارف کرایا گیا ہے۔

حکام کے مطابق اس اقدام کا مقصد چھوٹے اور درمیانے درجے کے کاروبار کو فروغ دینا، روزگار کے نئے مواقع پیدا کرنا اور مقامی معیشت کو مستحکم بنانا ہے۔

میچنگ گرانٹس کے لیے ماہی گیری، کھجور، آرگینک کپاس، گندم، زیرہ، لائیو اسٹاک و ڈیری، زرعی مداخل، کڑھائی و دستکاری، انگور، زیتون، فوڈ پروسیسنگ، سبزیوں اور باغبانی، زراعت، جنرل ریٹیل، خدمات اور دیگر متعلقہ کاروباری شعبوں کو ترجیح دی جائے گی۔

پروگرام کے تحت مائیکرو کاروبار کے لیے 5 لاکھ سے 10 لاکھ روپے، اسمال کاروبار کے لیے 10 لاکھ سے 50 لاکھ روپے، جبکہ درمیانے درجے کے کاروبار کے لیے ایک سے 2 کروڑ روپے تک کی میچنگ گرانٹس فراہم کی جائیں گی۔ مختلف کیٹیگریز کے تحت درخواست دہندگان کو 10 سے 30 فیصد تک اپنا حصہ بھی شامل کرنا ہوگا۔