ورلڈ بلڈ ڈونر ڈے: خون کا ایک عطیہ کسی کی زندگی بچا سکتا ہے، وزیراعلیٰ بلوچستان

وزیراعلیٰ بلوچستان میر سرفراز بگٹی نے ورلڈ بلڈ ڈونر ڈے پر کہا کہ خون کا ایک عطیہ کسی انسان کے لیے زندگی اور امید کا پیغام بن سکتا ہے۔ انہوں نے عوام پر زور دیا کہ خون عطیہ کرنے کی روایت کو فروغ دے کر انسانیت کی خدمت اور قیمتی جانوں کے تحفظ میں اپنا کردار ادا کریں۔

وزیراعلیٰ بلوچستان میر سرفراز بگٹی نے ورلڈ بلڈ ڈونر ڈے کے موقع پر اپنے پیغام میں کہا ہے کہ خون کا ایک عطیہ کسی انسان کے لیے زندگی اور امید کا پیغام بن سکتا ہے۔ انہوں نے کہا کہ رضاکارانہ طور پر خون عطیہ کرنے والے افراد انسانیت کے حقیقی محسن ہیں جو اپنی بے لوث خدمت کے ذریعے قیمتی جانیں بچانے میں اہم کردار ادا کرتے ہیں۔

وزیراعلیٰ نے کہا کہ حکومت بلوچستان عوام کو بروقت طبی سہولیات کی فراہمی، محفوظ خون کی دستیابی اور پیپلز ایئر ایمبولینس سروس کے ذریعے انسانی جانوں کے تحفظ کے لیے عملی اقدامات جاری رکھے ہوئے ہے۔ انہوں نے عوام سے اپیل کی کہ خون عطیہ کرنے کی روایت کو فروغ دیں اور انسانیت کی خدمت میں اپنا کردار ادا کریں۔

میر سرفراز بگٹی نے کہا کہ معاشرے میں خون کے عطیات کے حوالے سے آگاہی اور تعاون کو فروغ دینا وقت کی اہم ضرورت ہے تاکہ ضرورت مند مریضوں کو بروقت خون کی فراہمی یقینی بنائی جا سکے۔