یونیورسٹی آف مکران کے شعبہ کمپیوٹر سائنسز میں فوری تقرریوں کا فیصلہ، اعلیٰ تعلیم کا فروغ حکومت کی ترجیح ہے: وزیراعلیٰ بلوچستان

وزیراعلیٰ بلوچستان میر سرفراز بگٹی کی زیر صدارت اجلاس میں یونیورسٹی آف مکران، پنجگور کے شعبہ کمپیوٹر سائنسز کے لیے پی ایچ ڈی چیئرمین، دو لیکچررز اور مستقل تدریسی عملے کی بھرتی کا فیصلہ کیا گیا۔ اجلاس میں راحیلہ حمید درانی، شکیل قادر خان، زاہد سلیم، محمد صالح بلوچ اور پروفیسر ڈاکٹر سعادت بلوچ نے بھی شرکت کی۔

کوئٹہ: وزیراعلیٰ بلوچستان میر سرفراز بگٹی نے اعلیٰ تعلیم کے فروغ، جامعات کی استعداد کار میں اضافے اور طلبہ کو جدید دور کے تقاضوں سے ہم آہنگ سہولیات کی فراہمی کے عزم کا اعادہ کرتے ہوئے کہا ہے کہ بلوچستان کے نوجوانوں کو جدید علم اور مہارتوں سے آراستہ کرنا حکومت کی اولین ترجیحات میں شامل ہے۔انہوں نے یہ بات یونیورسٹی آف مکران، پنجگور کے شعبہ کمپیوٹر سائنسز کو درپیش مسائل اور تدریسی معیار میں بہتری کے حوالے سے منعقدہ اعلیٰ سطحی اجلاس کی صدارت کرتے ہوئے کہی۔ اجلاس میں صوبائی وزیر تعلیم راحیلہ حمید درانی، چیف سیکریٹری بلوچستان شکیل قادر خان، ایڈیشنل چیف سیکریٹری منصوبہ بندی و ترقی زاہد سلیم، سیکریٹری ہائر ایجوکیشن محمد صالح بلوچ جبکہ وائس چانسلر یونیورسٹی آف مکران پروفیسر ڈاکٹر سعادت بلوچ نے ویڈیو لنک کے ذریعے شرکت کی۔اجلاس میں فیصلہ کیا گیا کہ شعبہ کمپیوٹر سائنسز کے لیے پی ایچ ڈی ڈگری ہولڈر چیئرمین اور دو لیکچررز کی فوری تعیناتی کی جائے گی، جبکہ مستقل تدریسی عملے کی بھرتی بھی عمل میں لائی جائے گی تاکہ شعبے کو مزید مضبوط بنایا جا سکے اور طلبہ کو معیاری تعلیم فراہم کی جا سکے۔وزیراعلیٰ میر سرفراز بگٹی نے ہدایت کی کہ جامعات، بالخصوص انفارمیشن ٹیکنالوجی اور کمپیوٹر سائنسز جیسے اہم شعبوں میں تعلیمی معیار بہتر بنانے کے لیے تمام ضروری اقدامات جلد مکمل کیے جائیں۔ انہوں نے کہا کہ تعلیمی اداروں کو درپیش مسائل کے حل کے لیے صوبائی حکومت عملی اور دیرپا اصلاحات پر عمل پیرا ہے تاکہ بلوچستان میں اعلیٰ تعلیم کے شعبے میں پائیدار بہتری لائی جا سکے۔