ہنہ اُورک حملہ: دہشت گردوں کو فیصلہ کن انجام تک پہنچائیں گے، وزیراعلیٰ بلوچستان

وزیراعلیٰ بلوچستان میر سرفراز بگٹی نے ہنہ اُورک حملے کے زخمیوں کی عیادت کے بعد کہا کہ دہشت گردی کے ذریعے ریاست کو کمزور کرنے کی ہر کوشش ناکام بنائی جائے گی۔ انہوں نے شہداء کے خاندانوں کی مکمل معاونت، زخمیوں کو بہترین علاج اور دہشت گردوں، ان کے سہولت کاروں اور ریاست دشمن عناصر کے خلاف بلاامتیاز کارروائیاں مزید تیز کرنے کے عزم کا اعادہ کیا۔

کوئٹہ: وزیراعلیٰ بلوچستان میر سرفراز بگٹی نے کہا ہے کہ دہشت گردی کے ذریعے بلوچستان کے عوام کو خوفزدہ کرنے یا ریاست کو کمزور کرنے کی ہر کوشش کو فیصلہ کن انداز میں ناکام بنایا جائے گا۔
وزیراعلیٰ بلوچستان نے ہنہ اُورک دہشت گرد حملے کے زخمیوں کی عیادت کے بعد میڈیا سے گفتگو کرتے ہوئے پولیس، قانون نافذ کرنے والے اداروں اور سیکیورٹی فورسز کی بہادری، پیشہ ورانہ صلاحیت اور دہشت گردی کے خلاف مؤثر کردار کو سراہا۔
میر سرفراز بگٹی نے کہا کہ بزدلانہ دہشت گرد کارروائیاں ریاست کے عزم کو متزلزل نہیں کر سکتیں۔ انہوں نے یقین دہانی کرائی کہ شہداء کے اہلِ خانہ کی ہر ممکن معاونت کی جائے گی جبکہ زخمیوں کو بہترین طبی سہولیات فراہم کی جائیں گی۔ انہوں نے کہا کہ دہشت گردوں کے خلاف کارروائیاں منطقی انجام تک جاری رہیں گی اور ریاست کی رٹ ہر صورت برقرار رکھی جائے گی۔
وزیراعلیٰ نے شہداء کو خراجِ عقیدت پیش کرتے ہوئے کہا کہ انسانی جان کا کوئی نعم البدل نہیں، تاہم حکومت شہداء کے خاندانوں کو تنہا نہیں چھوڑے گی۔ انہوں نے اعلان کیا کہ مالی امداد کی فراہمی کا عمل جاری ہے، جبکہ شہداء کے بچوں کی سولہ سال کی عمر تک تعلیم، وظائف اور بنیادی اخراجات حکومت برداشت کرے گی۔
میر سرفراز بگٹی نے بلوچستان پولیس کی قربانیوں کو سراہتے ہوئے کہا کہ ایک پولیس افسر گزشتہ چند ماہ کے دوران دہشت گردوں کے خلاف کارروائیوں میں چوتھی مرتبہ زخمی ہوا، جو فورس کی جرات، عزم اور پیشہ ورانہ وابستگی کا واضح ثبوت ہے۔ انہوں نے انسپکٹر جنرل پولیس کی قیادت میں پولیس کی بہتر کارکردگی اور استعداد میں اضافے کی بھی تعریف کی۔
انہوں نے تمام قانون نافذ کرنے والے اداروں کو دہشت گردی کے خلاف مؤثر اور آئینی کردار ادا کرنے پر خراجِ تحسین پیش کیا۔ وزیراعلیٰ نے کہا کہ دہشت گرد عارضی طور پر نرم اہداف کو نشانہ بنا کر بے گناہ شہریوں کو نقصان پہنچاتے اور پروپیگنڈا ویڈیوز بنا کر فرار ہو جاتے ہیں، تاہم ریاست ان کے مذموم عزائم کو کبھی کامیاب نہیں ہونے دے گی۔
وزیراعلیٰ بلوچستان نے اس عزم کا اعادہ کیا کہ دہشت گردوں، ان کے سہولت کاروں اور ریاست دشمن عناصر کے خلاف بلاامتیاز کارروائیاں مزید تیز کی جائیں گی۔ انہوں نے کہا کہ شہریوں کے جان و مال کا تحفظ حکومت کی اولین ذمہ داری ہے اور بلوچستان میں پائیدار امن کے قیام کے لیے تمام ریاستی ادارے مکمل یکجہتی کے ساتھ اپنی ذمہ داریاں ادا کرتے رہیں گے۔

Sarfraz Bugti
Hanna Urak Attack
Counterterrorism
Balochistan Security