دہشت گرد عناصر اپنے آخری مرحلے میں ہیں، علی مرتضیٰ کی بیٹیوں کی تعلیم و پرورش کی ذمہ داری حکومت اٹھائے گی: وزیراعلیٰ بلوچستان

کراچی: وزیراعلیٰ بلوچستان میر سرفراز بگٹی نے کہا ہے کہ دہشت گرد عناصر اپنے آخری مرحلے میں ہیں اور ریاست پوری قوت اور عزم کے ساتھ ان کا مقابلہ کر رہی ہے۔ انہوں نے کہا کہ شہریوں کی جان و مال کا تحفظ حکومت کی اولین ذمہ داری ہے اور اس حوالے سے کسی قسم کی غفلت برداشت نہیں کی جائے گی۔

منگل کے روز وزیراعلیٰ بلوچستان نے کراچی میں حالیہ دشت واقعے میں جاں بحق ہونے والے تاجر علی مرتضیٰ کے گھر جا کر ان کے اہلخانہ سے تعزیت کی، مرحوم کے درجات کی بلندی کے لیے دعا کی اور سوگوار خاندان سے مکمل یکجہتی کا اظہار کیا۔

اس موقع پر میڈیا سے گفتگو کرتے ہوئے میر سرفراز بگٹی نے کہا کہ حکومت شہریوں کے تحفظ کی ذمہ داری پوری کرنے کے لیے تمام ممکنہ اقدامات کر رہی ہے۔ انہوں نے کہا کہ بلوچستان میں پیش آنے والے افسوسناک واقعات کو حقائق کے برعکس پیش کرنے سے عوام گمراہ ہوتے ہیں اور صوبے کے بارے میں منفی تاثر پیدا ہوتا ہے۔

وزیراعلیٰ نے کہا کہ "دشمن اگر سامنے ہو تو اس کا مقابلہ نسبتاً آسان ہوتا ہے، لیکن غیر واضح حالات میں کارروائیاں زیادہ پیچیدہ اور مشکل ہوتی ہیں۔" تاہم انہوں نے اس عزم کا اظہار کیا کہ ریاست ہر قسم کے خطرات سے نمٹنے کی مکمل صلاحیت رکھتی ہے۔

انہوں نے دشت کے حالیہ واقعے کا حوالہ دیتے ہوئے کہا کہ سوشل میڈیا پر اس حوالے سے جھوٹے بیانیے پھیلائے جا رہے ہیں، جن کی حوصلہ شکنی ضروری ہے۔ ان کا کہنا تھا کہ حقائق پر مبنی رپورٹنگ کو فروغ دینا وقت کی اہم ضرورت ہے تاکہ عوام تک درست معلومات پہنچ سکیں۔

میر سرفراز بگٹی نے کہا کہ بلوچستان کی شاہراہوں پر روزانہ ہزاروں افراد محفوظ سفر کرتے ہیں، لہٰذا کسی ایک افسوسناک واقعے کی بنیاد پر صوبے کی مجموعی امن و امان کی صورتحال کو غلط انداز میں پیش نہیں کیا جانا چاہیے۔

انہوں نے مرحوم علی مرتضیٰ کے اہلخانہ کو یقین دلایا کہ صوبائی حکومت ہر مشکل گھڑی میں ان کے ساتھ کھڑی رہے گی۔ وزیراعلیٰ نے اعلان کیا کہ حکومت مرحوم کی بیٹیوں کی تعلیم اور پرورش کی مکمل ذمہ داری اٹھائے گی۔

انہوں نے اس عزم کا اعادہ کیا کہ حکومت متاثرہ خاندان کی ہر ممکن مدد جاری رکھے گی اور صوبے میں امن کے قیام، شہریوں کے تحفظ اور دہشت گردی کے مکمل خاتمے کے لیے اپنی کوششیں مزید تیز کرے گی۔