جامعہ بلوچستان کی ڈیجی بز طالبہ صالحہ کو ڈیجیٹل معیشت میں کامیابی پر حکومتی اعزاز

جامعہ بلوچستان کے ڈیجی بز پروگرام کی طالبہ صالحہ کو ڈیجیٹل معیشت میں نمایاں کامیابی اور آن لائن آمدن حاصل کرنے پر حکومت بلوچستان کی جانب سے اعزاز دیا گیا۔ تقریب میں صوبائی وزراء نے ان کی کارکردگی کو سراہتے ہوئے انہیں نوجوانوں خصوصاً طالبات کے لیے قابلِ تقلید مثال قرار دیا۔

کوئٹہ: جامعہ بلوچستان کے ڈیجی بز پروگرام کی طالبہ صالحہ کو ڈیجیٹل معیشت کے شعبے میں نمایاں کامیابی اور آن لائن ذرائع سے آمدن حاصل کرنے پر حکومت بلوچستان کی جانب سے خصوصی اعزاز سے نوازا گیا۔

اس سلسلے میں منعقدہ ایک تقریب میں صوبائی وزیر تعلیم راحیلہ حمید درانی، صوبائی وزیر برائے امورِ نوجوانان مینا مجید بلوچ اور صوبائی وزیر میر ظہور احمد بلیدی نے صالحہ کو ان کی شاندار کارکردگی کے اعتراف میں یادگاری شیلڈ پیش کی۔

جامعہ بلوچستان نے صالحہ کی کامیابی کو سراہتے ہوئے انہیں مبارکباد پیش کی اور کہا کہ ان کی محنت، عزم اور پیشہ ورانہ صلاحیتیں دیگر طلبہ و طالبات، بالخصوص نوجوان خواتین کے لیے ایک قابلِ تقلید مثال ہیں۔ جامعہ انتظامیہ کے مطابق یونیورسٹی جدید تعلیم، ڈیجیٹل مہارتوں اور کاروباری صلاحیتوں کے فروغ کے لیے عملی اقدامات جاری رکھے ہوئے ہے، جبکہ صالحہ کی کامیابی نوجوانوں کو آزاد پیشہ ورانہ خدمات اور آن لائن کاروبار کے شعبے میں آگے بڑھنے کی ترغیب دے گی۔