ڈسٹرکٹ ایجوکیشن گروپ کا جائزہ اجلاس، نان فنکشنل اسکولوں پر اہم فیصلے

ڈپٹی کمشنر کوئٹہ مہراللہ بادینی کی زیر صدارت ڈسٹرکٹ ایجوکیشن گروپ کا اجلاس منعقد ہوا، جس میں نان فنکشنل اسکولوں، اساتذہ کی تعیناتیوں، حاضری، تنخواہوں اور تعلیمی نظام کی بہتری سے متعلق امور پر غور کیا گیا۔ اجلاس میں نان فنکشنل اسکولوں کو فنکشنل بنانے اور ہفتہ وار جائزہ اجلاس منعقد کرنے کا فیصلہ کیا گیا۔

رپورٹ: سیدہ نتاشا

کوئٹہ میں ڈسٹرکٹ ایجوکیشن گروپ کا جائزہ اجلاس ڈپٹی کمشنر کوئٹہ مہراللہ بادینی کی زیر صدارت منعقد ہوا۔ اجلاس میں ایڈیشنل ڈپٹی کمشنر (جنرل) محمد انور کاکڑ، ڈسٹرکٹ ایجوکیشن آفیسر سید نصیر علی شاہ، اسسٹنٹ کمشنر سریاب، اسسٹنٹ کمشنر کچلاک، ڈسٹرکٹ ایجوکیشن آفیسر (فیمیل) اور تمام متعلقہ ڈی ڈی اوز نے شرکت کی۔
اجلاس میں فیز تھری کی تعیناتیوں، نان فنکشنل اسکولوں، بی ای ایم آئی ایس، ایس بی کے کے ذریعے تعینات اساتذہ، ان کی تنخواہوں، جائے تعیناتی اور مسلسل غیر حاضر رہنے والے عملے کے معاملات پر تفصیلی گفتگو کی گئی۔

ڈپٹی کمشنر کوئٹہ نے تمام ڈی ڈی اوز کو ہدایت کی کہ نان فنکشنل اسکولوں کا مکمل ڈیٹا فراہم کیا جائے، خصوصاً وہ اسکول جہاں عمارت موجود نہیں، تاکہ فوری طور پر عمارت کا بندوبست کیا جا سکے اور تعلیمی سرگرمیاں متاثر نہ ہوں۔
انہوں نے مزید کہا کہ جن علاقوں میں آبادی نہ ہونے کے باعث اسکول نان فنکشنل ہیں، انہیں قریبی فعال اسکولوں میں ضم کیا جائے۔ ڈپٹی کمشنر نے واضح کیا کہ نان فنکشنل اسکولوں کو ہر صورت فعال بنایا جائے گا اور اس مقصد کے لیے ہفتہ وار اجلاس باقاعدگی سے منعقد ہوں گے۔
ان کا کہنا تھا کہ کوئٹہ میں تعلیمی نظام کی بہتری کے لیے ضلعی انتظامیہ ہر ممکن تعاون فراہم کرے گی۔