مون سون 2026: ایمرجنسی رسپانس کمیٹی کے اجلاس میں آفات سے نمٹنے کی تیاریوں کا جائزہ

اسلام آباد میں ایمرجنسی رسپانس کمیٹی کے اجلاس میں مون سون 2026 کے لیے صوبائی تیاریوں، ہنگامی منصوبہ بندی اور اداروں کے درمیان رابطوں کا جائزہ لیا گیا۔ اجلاس میں قبل از وقت وارننگ سسٹم، وسائل کی بروقت فراہمی اور مؤثر ہنگامی ردِعمل کو مزید مضبوط بنانے پر زور دیا گیا۔

اسلام آباد: مون سون 2026 کے حوالے سے ایمرجنسی رسپانس کمیٹی (ای آر سی) کا دوسرا اجلاس وفاقی وزیر منصوبہ بندی، ترقی و خصوصی اقدامات ڈاکٹر احسن اقبال کی زیرِ صدارت نیشنل ایمرجنسیز آپریشن سینٹر (این ای او سی) اسلام آباد میں منعقد ہوا۔

اجلاس میں حکومت بلوچستان کی جانب سے ایڈیشنل چیف سیکرٹری زاہد سلیم، پی ڈی ایم اے بلوچستان کے ڈائریکٹر پلاننگ اینڈ کوآرڈینیشن/ریسکیو 1122 نوید احمد اور سیکشن انچارج کوآرڈینیشن عمیر علی نے شرکت کی۔

اجلاس میں مون سون 2026 کے لیے صوبائی تیاریوں، ہنگامی منصوبہ بندی، پہلے اجلاس کے فیصلوں پر عملدرآمد، وزارت موسمیاتی تبدیلی کے 200 روزہ منصوبے کی پیش رفت اور مختلف اداروں کے درمیان رابطوں کا جائزہ لیا گیا۔ اس موقع پر قبل از وقت وارننگ سسٹم، وسائل کی بروقت فراہمی، ادارہ جاتی تعاون اور ہنگامی صورتحال میں مؤثر ردِعمل کو مزید مضبوط بنانے پر زور دیا گیا۔

پی ڈی ایم اے بلوچستان نے اس عزم کا اعادہ کیا کہ مون سون کے دوران انسانی جانوں، روزگار اور اہم بنیادی ڈھانچے کے تحفظ کے لیے آفات سے نمٹنے کی تیاریوں اور مؤثر ہنگامی ردِعمل کو یقینی بنایا جائے گا۔