یورپی یونین کے تعاون سے بلوچستان ایجوکیشن سپورٹ پروگرام کے تحت 7 لاکھ 60 ہزار سے زائد طلبہ مستفید

بلوچستان ایجوکیشن سپورٹ پروگرام (بی ای ایس فیز- 2) کے تحت لاکھوں طلبہ و طالبات کو معیاری تعلیم، ڈیجیٹل سہولیات، اساتذہ کی تربیت اور بہتر تعلیمی ماحول فراہم کیا گیا۔ پروگرام کے ذریعے تعلیم سے محروم بچوں کی دوبارہ اسکولوں میں شمولیت، لڑکیوں کی تعلیم کے فروغ، تیز رفتار تعلیمی کے نفاذ اور تعلیمی نظام میں ڈیجیٹل اصلاحات کے میدان میں نمایاں پیش رفت حاصل ہوئی۔

کوئٹہ: بلوچستان ایجوکیشن سپورٹ پروگرام (بی ای ایس۔فیز 2 ) کے تحت، جو یورپی یونین کے تعاون سے جاری ہے، صوبے میں تعلیم کے فروغ، ڈیجیٹل اصلاحات، اساتذہ کی تربیت، اسکولوں کی بہتری اور تعلیم سے محروم بچوں کی دوبارہ شمولیت کے شعبوں میں نمایاں پیش رفت حاصل کی گئی ہے۔

پانچ سالہ پروگرام (2021 تا 2026) سے اب تک 7 لاکھ 60 ہزار سے زائد طلبہ و طالبات مستفید ہوئے ہیں، جن میں 3 لاکھ 35 ہزار سے زائد طالبات شامل ہیں۔ پروگرام کے تحت بلوچستان کی پہلی ڈیجیٹل اسکول مردم شماری مکمل کی گئی، فوری معلومات پر مبنی اسکول نگرانی کا نظام متعارف کرایا گیا اور آن لائن تدریسی اکیڈمی بھی قائم کی گئی۔

تعلیمی معیار بہتر بنانے کے لیے 10 ہزار 600 سے زائد اساتذہ کو تربیت فراہم کی گئی، جبکہ 4 ہزار سے زائد اساتذہ کی پیشہ ورانہ صلاحیتوں میں اضافہ کیا گیا۔ اس کے علاوہ 3 ہزار والدین، اساتذہ اور اسکول انتظامی کمیٹیوں کو فعال بنایا گیا اور 16 ہزار سے زائد کمیونٹی اراکین کو تعلیمی سرگرمیوں میں شامل کیا گیا۔

تعلیم سے محروم بچوں کو دوبارہ اسکول لانے کے لیے 20 ہزار سے زائد پرائمری سطح کے بچوں کو تیز رفتار تعلیمی پروگرام (ALP) مراکز کے ذریعے دوبارہ داخل کیا گیا، جبکہ 2 ہزار 200 سے زائد مڈل سطح کے بچوں کو بھی تعلیمی دھارے میں واپس لایا گیا، جن میں اکثریت لڑکیوں کی تھی۔

پروگرام کے تحت 1 ہزار 230 اسکولوں میں تعلیمی ماحول کو بہتر بنایا گیا، جس سے ایک لاکھ 50 ہزار سے زائد بچوں کو فائدہ پہنچا۔ اس کے علاوہ 6 ہزار 100 سے زائد نوجوانوں کو تعلیم اور روزگار سے متعلق عملی اور پیشہ ورانہ مہارتیں فراہم کی گئیں۔

سیلاب سے متاثرہ علاقوں میں بھی پروگرام کے تحت 6 ہزار 600 سے زائد بچوں کو تعلیمی معاونت فراہم کی گئی، جبکہ 72 ہزار سے زائد نوعمر لڑکیوں اور 26 ہزار سے زائد بچوں کو صحت، صفائی اور طبی معائنے کی سہولیات مہیا کی گئیں۔

پروگرام کے نتیجے میں معیاری تعلیم تک رسائی میں اضافہ، لڑکیوں کی تعلیم اور صنفی مساوات کا فروغ، تعلیمی نظام میں ڈیجیٹلائزیشن، بہتر منصوبہ بندی اور احتساب کو مضبوط بنانے میں اہم پیش رفت ہوئی ہے۔ حکومت بلوچستان، یورپی یونین اور یونیسف نے مستقبل میں بھی بلوچستان ایجوکیشن سپورٹ پروگرام (بی ای ایس۔فیز دوم) کے ذریعے تعلیمی شعبے میں باہمی تعاون جاری رکھنے کے عزم کا اعادہ کیا ہے۔