جرمنی، یو این ڈی پی اور حکومت بلوچستان کی جانب سے سیلاب متاثرین کو موسمیاتی مزاحم گھروں کی فراہمی

اقوام متحدہ کے ترقیاتی پروگرام (یو این ڈی پی) نے جرمن حکومت کی مالی معاونت اور حکومت بلوچستان کے اشتراک سے ضلع کوئٹہ کے علاقے ہنہ اُورک میں 2022 کے تباہ کن سیلاب سے متاثرہ خاندانوں کے حوالے موسمیاتی مزاحم گھر کر دیے۔

یہ اقدام فلڈ ری کنسٹرکشن اینڈ کوآرڈینیشن پروگرام کے تحت کیا گیا ہے، جس کے ذریعے بلوچستان بھر میں 700 موسمیاتی اور قدرتی آفات سے محفوظ گھروں کی تعمیر کی جا رہی ہے۔ ان گھروں کو سیلاب، زلزلوں اور موسمیاتی تبدیلیوں کے اثرات سے بہتر تحفظ فراہم کرنے کے لیے جدید اور مضبوط طرزِ تعمیر کے مطابق بنایا گیا ہے۔

گھروں کی حوالگی کی تقریب میں بلوچستان میں جرمنی کے اعزازی قونصل میر مراد بلوچ، یو این ڈی پی پاکستان کے نمائندہ ڈاکٹر سیموئیل رزق، یو این ڈی پی کی ڈپٹی ریزیڈنٹ نمائندہ وان نگوئین، حکومت بلوچستان کے اعلیٰ حکام، ضلعی انتظامیہ کے نمائندوں اور مقامی افراد نے شرکت کی۔

اس موقع پر سیکریٹری منصوبہ بندی حکومت بلوچستان ذیشان جاوید نے ترقی اور بحالی کے چیلنجز سے نمٹنے کے لیے باہمی تعاون کی اہمیت پر زور دیتے ہوئے کہا کہ حکومتی اداروں، ترقیاتی شراکت داروں اور مقامی کمیونٹیز کے درمیان اشتراک ہی ایک مضبوط اور پائیدار مستقبل کی بنیاد ہے۔

حکام کے مطابق 2022 کے سیلاب میں اپنے گھر کھونے والے خاندانوں کے لیے یہ نئے مکانات محفوظ اور باوقار رہائش فراہم کریں گے، جبکہ مستقبل میں موسمیاتی خطرات اور قدرتی آفات کے اثرات سے تحفظ میں بھی مددگار ثابت ہوں گے۔ یہ منصوبہ بلوچستان میں بحالی اور موسمیاتی لچک کو فروغ دینے کی وسیع تر کوششوں کا حصہ ہے۔