گوادر پورٹ پر بین الاقوامی ٹرانس شپمنٹ سرگرمیاں جاری

علاقائی بحری کشیدگی کے باوجود گوادر پورٹ پر تجارتی سرگرمیاں جاری ہیں، جہاں بنگلہ دیشی پرچم بردار جہاز سنگاپور سے اسٹیل بلیٹس لے کر پہنچا۔ کارگو کو عارضی طور پر گوادر میں ذخیرہ کرنے کے بعد دوسرے جہاز کے ذریعے متحدہ عرب امارات روانہ کیا جائے گا، جبکہ حکام نے اسے بندرگاہ پر عالمی اعتماد کی علامت قرار دیا۔

گوادر: علاقائی بحری کشیدگی کے باوجود گوادر پورٹ پر تجارتی سرگرمیاں معمول کے مطابق جاری ہیں، جہاں ایک اور ٹرانس شپمنٹ کارگو جہاز نے بندرگاہ پر لنگر انداز ہو کر کارگو کی ہینڈلنگ شروع کر دی ہے۔

حکام کے مطابق بنگلہ دیشی پرچم بردار جہاز ایم وی جہان برادرز ٹو سنگاپور سے 53 ہزار 64.660 میٹرک ٹن پرائم اسٹیل بلیٹس لے کر گوادر پورٹ پہنچا۔ یہ کارگو عارضی طور پر گوادر پورٹ پر اتارا اور ذخیرہ کیا جائے گا، جس کے بعد اسے دوسرے جہاز کے ذریعے متحدہ عرب امارات کی الحمریہ پورٹ روانہ کیا جائے گا۔

وفاقی وزیر برائے بحری امور جنید انوار چوہدری نے کہا کہ موجودہ علاقائی صورتحال کے باوجود گوادر پورٹ پر تجارتی سرگرمیوں کا تسلسل پاکستان کی بندرگاہی صلاحیتوں اور بین الاقوامی شپنگ کمپنیوں کے بڑھتے ہوئے اعتماد کا مظہر ہے۔ انہوں نے کہا کہ ٹرانس شپمنٹ سرگرمیوں میں اضافہ گوادر پورٹ کی اسٹریٹجک اہمیت اور خطے میں متبادل تجارتی مرکز کے طور پر اس کے کردار کو مزید مستحکم کر رہا ہے۔

انہوں نے کہا کہ حکومت بندرگاہی انفراسٹرکچر کو بہتر بنانے، بین الاقوامی شپنگ لائنز کو سہولیات فراہم کرنے اور علاقائی تجارت کے فروغ کے لیے اقدامات جاری رکھے ہوئے ہے۔

چیئرمین گوادر پورٹ نورالحق بلوچ نے کہا کہ ٹرانس شپمنٹ کارگو کی کامیاب ہینڈلنگ اس بات کا ثبوت ہے کہ گوادر پورٹ محفوظ، قابلِ اعتماد اور مؤثر تجارتی مرکز کے طور پر اپنی صلاحیت ثابت کر رہا ہے۔ انہوں نے کہا کہ بندرگاہ پر بین الاقوامی شپنگ کمپنیوں کا اعتماد بڑھ رہا ہے اور گوادر علاقائی تجارت کے لیے ایک اہم ٹرانزٹ ہب کے طور پر اپنی اہمیت مزید مستحکم کر رہا ہے۔