پاک ایران سرحدی حکام کا اہم اجلاس، بارڈر ٹریڈ اور سیکیورٹی تعاون بڑھانے پر اتفاق

کوئٹہ: پاک ایران راہداری گیٹ پر پاکستان اور ایران کے سرحدی حکام کے وفود کے درمیان اہم اجلاس منعقد ہوا، جس میں دوطرفہ تعاون اور سرحدی امور پر تفصیلی تبادلۂ خیال کیا گیا۔

پاکستانی وفد کی قیادت ڈپٹی کمشنر چاغی جہانزیب شاہوانی نے کی، جبکہ اسسٹنٹ کمشنر تفتان نعیم قاسم شاہوانی بھی ان کے ہمراہ تھے۔ ایرانی وفد میں مرزبان درجہ یک اقبالی اور مرزبان درجہ دو سردار شجاع شامل تھے۔

اجلاس میں زائرین کی آمدورفت، بارڈر ٹریڈ کے فروغ، سرحدی سیکیورٹی، اسمگلنگ کی روک تھام، بارڈر کراسنگ، سرحدی باڑ اور دیگر اہم تجارتی امور پر گفتگو کی گئی۔

دونوں ممالک کے حکام نے اس بات پر اتفاق کیا کہ بارڈر ٹریڈ کو مزید منظم، محفوظ اور مؤثر بنانے کے لیے مشترکہ اقدامات کیے جائیں تاکہ عوام کو زیادہ سے زیادہ سہولیات فراہم کی جا سکیں۔

ڈپٹی کمشنر چاغی جہانزیب شاہوانی نے کہا کہ سیکیورٹی صورتحال میں مزید بہتری آنے کے بعد زائرین کی آمدورفت دوبارہ شروع کی جائے گی۔ انہوں نے بتایا کہ اس سلسلے میں حکومتِ ایران کو باقاعدہ مراسلہ بھی ارسال کیا جائے گا۔