Urdu Headline : اوپن ایکس اسپیس سیشن: وزیراعلیٰ بلوچستان کا گمراہ کن بیانیوں کا حقائق سے جواب، نوجوانوں کے لیے حکومتی اقدامات پر روشنی

وزیراعلیٰ بلوچستان میر سرفراز بگٹی نے اوپن ایکس اسپیس سیشن میں بلوچستان سے متعلق گمراہ کن بیانیوں، خصوصاً لاپتا افراد کے معاملے پر حکومت کا مؤقف شواہد کی بنیاد پر پیش کیا۔ انہوں نے نوجوانوں کی فلاح، تعلیمی وظائف، ڈیجیٹل رابطوں، اصلاحات اور ریاستی عملداری کے فروغ کے لیے حکومتی اقدامات پر بھی تفصیلی روشنی ڈالی۔

: وزیراعلیٰ بلوچستان میر سرفراز بگٹی نے سوشل میڈیا پلیٹ فارم پر منعقدہ ایک اوپن اسپیس سیشن میں مختلف موضوعات پر گفتگو کرتے ہوئے کہا کہ بلوچستان سے متعلق گمراہ کن بیانیے، خصوصاً لاپتا افراد کے معاملے پر حقائق اور شواہد کی بنیاد پر مؤقف پیش کیا گیا۔
وزیراعلیٰ سیکریٹریٹ سے جاری اعلامیے کے مطابق اوپن ایکس اسپیس سیشن میں 16 ہزار سے زائد افراد نے شرکت کی، جن میں مختلف مکاتبِ فکر سے تعلق رکھنے والے افراد، این جی اوز کے نمائندے اور ناقدین بھی شامل تھے۔
میر سرفراز بگٹی نے کہا کہ یوتھ انگیجمنٹ پلان کے تحت گوادر سمیت بلوچستان کے تمام اضلاع میں نوجوانوں کے لیے بہتر مواقع فراہم کرنے کے مختلف منصوبوں پر کام جاری ہے۔ انہوں نے کہا کہ صوبائی حکومت نوجوانوں کی تعلیم، روزگار اور ترقی کو اپنی ترجیحات میں شامل کیے ہوئے ہے۔
انہوں نے الزام عائد کیا کہ بلوچ یکجہتی کمیٹی لاپتا افراد اور عوامی حقوق کے نام پر تشدد کو ہوا دینے کی کوشش کر رہی ہے۔
وزیراعلیٰ نے بتایا کہ صوبائی حکومت نے پنشن اصلاحات، الیکٹرک وہیکلز پالیسی، غیر ضروری اخراجات میں کمی اور مختلف سرکاری محکموں میں جامع اصلاحات متعارف کرائی ہیں۔ انہوں نے کہا کہ ایجوکیشن اینڈومنٹ فنڈ کے ذریعے اعلیٰ تعلیم کے لیے خصوصی وظائف فراہم کیے جا رہے ہیں، جبکہ 4 ارب روپے کے منصوبے کے تحت اسکولوں، کالجوں، جامعات اور صحت مراکز کو تیز رفتار انٹرنیٹ کی سہولت فراہم کی جا رہی ہے۔
میر سرفراز بگٹی نے کہا کہ پاکستان کی پیشہ ور مسلح افواج ریاست کی رٹ کو یقینی بنانے کی مکمل صلاحیت رکھتی ہیں اور کوئی بھی پرتشدد عنصر ریاستی عملداری کو چیلنج نہیں کر سکتا۔اعلامیے کے مطابق مبصرین نے وزیراعلیٰ کے شواہد پر مبنی مؤقف کو بلوچستان کے حوالے سے منفی پروپیگنڈے کا مؤثر جواب قرار دیا، جبکہ نوجوانوں کی بڑی تعداد میں شرکت کو عوامی رابطے اور براہِ راست مکالمے کی ایک مثبت مثال بھی قرار دیا گیا۔

Sarfraz Bugti, X Space Session, Balochistan Government ,Youth Engagement Plan