واقعۂ کربلا حق و انصاف کا لازوال پیغام، عاشورہ اتحاد و رواداری کی یاد دہانی ہے: وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے یومِ عاشورہ کے موقع پر حضرت امام حسینؓ اور ان کے جانثار ساتھیوں کی عظیم قربانیوں کو خراجِ عقیدت پیش کرتے ہوئے کہا ہے کہ واقعۂ کربلا پوری انسانیت کے لیے حق، انصاف، صبر اور استقامت کا لازوال پیغام ہے۔

اپنے خصوصی پیغام میں وزیراعلیٰ نے کہا کہ حضرت امام حسینؓ نے اسلام کی سربلندی، حق کی فتح اور ظلم و جبر کے خلاف بے مثال جرات اور ثابت قدمی کا مظاہرہ کیا، جو آج بھی امتِ مسلمہ کے لیے مشعلِ راہ ہے۔ انہوں نے کہا کہ واقعۂ کربلا ہمیں یہ درس دیتا ہے کہ باطل کے سامنے سر جھکانے کے بجائے حق اور انصاف کی خاطر ہر قربانی دینے کے لیے تیار رہنا چاہیے۔

میر سرفراز بگٹی نے کہا کہ یومِ عاشورہ اتحاد، بھائی چارے، برداشت اور باہمی احترام کی اقدار کو فروغ دینے کا دن ہے۔ انہوں نے اس عزم کا اعادہ کرنے پر زور دیا کہ معاشرے میں امن، رواداری، ہم آہنگی اور قانون کی حکمرانی کو فروغ دیا جائے۔

وزیراعلیٰ نے کہا کہ صوبائی حکومت نے محرم الحرام بالخصوص یومِ عاشورہ کے موقع پر امن و امان برقرار رکھنے اور عزاداروں کو ہر ممکن سہولیات فراہم کرنے کے لیے جامع انتظامات کیے ہیں۔ انہوں نے علما کرام، ذاکرین، مجالس و جلوسوں کے منتظمین اور عوام کے تعاون کو سراہتے ہوئے کہا کہ باہمی ہم آہنگی اور قومی یکجہتی کے ذریعے امن و استحکام کو مزید مضبوط بنایا جا سکتا ہے۔

انہوں نے دعا کی کہ اللہ تعالیٰ حضرت امام حسینؓ اور شہدائے کربلا کی قربانیوں کے صدقے پاکستان کو امن، ترقی اور خوشحالی عطا فرمائے اور قوم کو حق و انصاف کے راستے پر چلنے کی توفیق دے۔