نصیرآباد کے نوجوان گلوکار شاہد جمالی نے صوبائی سطح پر کامیابی کا نیا باب رقم کر دیا

ضلع نصیرآباد سے تعلق رکھنے والے نوجوان گلوکار شاہد جمالی نے "ایمان بلوچستان ٹیلنٹ ہنٹ پروگرام" میں اے کلاس کیٹیگری میں پہلی پوزیشن حاصل کر کے اپنے ضلع اور خاندان کا نام روشن کیا۔ ان کی کامیابی بلوچستان کے باصلاحیت نوجوانوں کے لیے امید اور حوصلے کی ایک روشن مثال بن گئی ہے۔

رپورٹ : نصیرآباد
بلوچستان کے ضلع نصیرآباد کی ایک سادہ سی بستی سے اٹھنے والی آواز آج پورے صوبے میں پہچانی جا رہی ہے۔ یہ کہانی ہے ایک ایسے نوجوان کی، جس نے محدود وسائل، مشکلات اور محرومیوں کے باوجود اپنے خواب کا دامن نہیں چھوڑا۔یہ ہیں نوجوان گلوکار ۔ شاہد علی جمالی، جنہوں نے اپنی محنت، لگن اور خداداد صلاحیتوں کے بل بوتے پر موسیقی کی دنیا میں اپنی الگ پہچان بنائی۔شاہد جمالی کا تعلق نصیرآباد کے ایک دیہی علاقے سے ہے، جہاں محدود وسائل کے باوجود انہوں نے اپنے والد دائم جمالی کی رہنمائی میں فنِ موسیقی کا سفر شروع کیا۔ مقامی تقریبات سے آغاز کرنے والے شاہد نے مسلسل ریاض اور محنت کے ذریعے اپنی صلاحیتوں کو نکھارا اور اپنی آواز کو صوبائی سطح تک پہنچا دیا۔ صوبائی سطح پر منعقد ہونے والے "ایمان بلوچستان ٹیلنٹ ہنٹ پروگرام" میں شاہد جمالی نے سینکڑوں امیدواروں کے درمیان اپنی صلاحیتوں کا لوہا منوایا اور اے کلاس کیٹیگری میں پہلی پوزیشن حاصل کر کے نہ صرف اپنے خاندان بلکہ پورے ضلع نصیرآباد کا نام روشن کر دیا۔نظرِبان بلوچستان سے خصوصی گفتگو کرتے ہوئے شاہد جمالی نے کہا کہ بلوچستان میں ٹیلنٹ کی کوئی کمی نہیں، ضرورت صرف مواقع اور سرپرستی کی ہے۔
شاہد جمالی کی کامیابی اس حقیقت کی روشن مثال ہے کہ خواب بڑے ، ارادے مضبوط اور محنت مسلسل ہو تو وسائل کی کمی بھی منزل تک پہنچنے سے نہیں روک سکتی۔آج شاہد جمالی صرف ایک نوجوان گلوکار نہیں، بلکہ نصیرآباد کے ان گنت باصلاحیت نوجوانوں کی امید بن چکے ہیں جو محدود وسائل کے باوجود اپنے خوابوں کو حقیقت میں بدلنے کا حوصلہ رکھتے ہیں۔ ان کی کامیابی اس پیغام کی ترجمان ہے کہ بلوچستان کی دھرتی ٹیلنٹ سے مالا مال ہے، ضرورت صرف ایسے ہونہار نوجوانوں کو آگے لانے اور ان کی سرپرستی کرنے کی ہے۔