بلوچستان میں زرعی ترقی اور برآمدات کے لیے نئی راہیں۔

سیکرٹری ٹریڈ ڈویلپمنٹ اتھارٹی آف پاکستان (TDAP) شہریار خان نے کوئٹہ چیمبر آف کامرس کے دورے کے دوران اگست یا ستمبر میں بلوچستان میں زرعی نمائش کے انعقاد کا اعلان کیا۔ نمائش کا مقصد صوبے کی زرعی پیداوار کو ویلیو ایڈیشن، سرٹیفیکیشن اور فوڈ سیفٹی کے ذریعے عالمی منڈیوں تک پہنچانا ہے۔

رپورٹ: سیدہ نتاشا
سیکرٹری ٹریڈ ڈویلپمنٹ اتھارٹی آف پاکستان (TDAP) شہریار خان کی ایوان صنعت و تجارت کوئٹہ آمد پر صدر چیمبر آف کامرس اینڈ انڈسٹری کوئٹہ بلوچستان حاجی محمد ایوب خان مریانی اور نائب صدر انجینئر میر وائس خان کاکڑ نے ان کا پرتپاک استقبال کیا۔
اس موقع پر منعقدہ سیشن سے خطاب کرتے ہوئے سیکرٹری TDAP شہریار خان نے اعلان کیا کہ اگست یا ستمبر میں بلوچستان میں ایک بڑی زرعی نمائش کا انعقاد کیا جائے گا، جس کا مقصد صوبے میں پیدا ہونے والی زرعی اجناس بالخصوص زیتون، سیب، پیاز، ٹماٹر اور دیگر میوہ جات و سبزیوں کی ویلیو ایڈیشن، سرٹیفیکیشن اور فوڈ سیفٹی کے ذریعے یورپی اور وسطی ایشیائی منڈیوں تک رسائی کو یقینی بنانا ہے۔

انہوں نے بتایا کہ کراچی میں منعقدہ زرعی نمائش کے مثبت نتائج سامنے آئے ہیں، جس کے نتیجے میں اب تک 52 ملین ڈالرز کی ڈیمانڈز موصول ہو چکی ہیں۔ انہوں نے مزید کہا کہ پاکستان ہارٹیکلچر ڈویلپمنٹ اینڈ ایکسپورٹ کمپنی (PHDEC) کا دفتر بھی جلد کوئٹہ میں قائم کیا جا رہا ہے، جس سے صوبے کے زمینداروں اور برآمدکنندگان کو براہِ راست فائدہ پہنچے گا۔
اس موقع پر صدر چیمبر حاجی محمد ایوب خان مریانی، زمیندار نمائندگان اور PHDEC کے حکام نے بلوچستان میں زیتون، زعفران اور دیگر زرعی فصلوں کی ویلیو ایڈیشن، جدید مشینری کی فراہمی اور زمینداروں کو مشاورتی سہولیات فراہم کرنے کو وقت کی اہم ضرورت قرار دیا۔